Ler en mancomún

Resolta a convocatoria de Clubs de Lectura para o curso 2011/2012

2011-12-30T11:57:00.003+01:00

O Portal Educativo da Consellería de Educación e Ordenación Universitaria publica hoxe a Resolución da Dirección Xeral de Centros e Recursos Humanos pola que se asignan contías para o funcionamento dos Clubs de Lectura en centros públicos que matriculan alumnado de ensino secundario, bacharelato, formación profesional, ensinanzas de persoas adultas e de réxime especial, para o curso 2011/2012. Un total de 215 centros acollen durante este curso un club de lectura, que na maioría dos casos conta con varios grupos de lectores e lectoras, en función de intereses, idade e operatividade. Aumentan así mesmo o número de clubs que contan cun grupo de lectores adultos (profesoras e profesores, nais e pais, persoal non docente...).
+ información

O QUE APARECE NOS BLOGUES...

2011-12-20T09:32:00.006+01:00

No blogue do Club de lectura Caladoiro do IES A Sardiñeira, recóllense presentacións de discos e de libros, campañas de lectura e de uso da lingua, actividades de lecer cultural na cidade e, incluso, boas imaxes de lectores da man de Lorenzo Mattoti.

Animámosvos a que entredes pola súa fiestra e o sigades.

VIAXAR COS LIBROS COMO MOTIVO, VIAXAR A TRAVÉS DOS LIBROS

2011-12-15T11:12:00.009+01:00

O club de lectura bibliobrey, do CEIP Fermín Bouza Brey de Ponteareas, viaxa realizando rutas literarias. Así o contan...

"Para despedida, o club de lectura disfrutou dun roteiro literario polo río Tea.Lemos diferentes poemas de Javier Heraud, dedicados ao río, e incluso un escrito por María Portela, membro do noso club. E...o bizcoito de chocolate tampouco podía faltar. Houbo entrega de diplomas e un folleto de recomendacións de "libros con sabor a chocolate".

Pero outras veces, viaxan no tempo cos Megatoxos, e así o relatan...

"Este xoves pasado xuntámonos para falar dos Megatoxos e do aprendiz de Druída. Foi unha sesión chea de entusiasmo, todos querían participar cos seus comentarios e opinións. Falamos dos poderes especiais dos protagonistas e tamén dos celtas, pobo ao que viaxan, e sobre o que investigaron algúns dos membros do club. Todo esto acompañado de diferentes doces feitos por eles mesmos para a ocasión. Gustoulles poder acompañar aos Megatoxos nesta viaxe no tempo e xa están desexando ler as seguintes aventuras destes rapaces e rapazas"

LECTURAS POR MESES

2011-12-13T14:18:00.010+01:00

Cada mes os seus libros!
Así len os de Balbordo e Balbordobis, os clubs de lectura do IES Rïo Cabe de Monforte.

Neste mes de decembro andan ás voltas con A palabra exacta de Antón Lopo, Tristes armas de Marina Mayoral, Qué blanca más bonita soy de D. Verroen e Orejas de mariposa de Luisa Aguilar.
Boas lecturas!

NOVO BLOGUE DE CLUB

2011-12-09T10:47:00.015+01:00

O IES Poeta Añón de Outes puxo en marcha o seu club de lectura e, con el, un novo blogue.
Nel cóntannos:
"O pasado día 7 de novembro tivo lugar a primeira xuntanza deste curso dos "Laretas". Como vedes nas fotos, para ir rompendo o xeo e coñecernos mellor, compartimos unhas pizzas quentiñas que fixeron a boca auga a todos os que por alí se acercaron. Foi tamén a ocasión de dar a benvida ó club a dúas lectoras: Alba e Tatiana, de 4º ESOA lectura que compartimos esta vez foi "Cuando Hitler robó el conejo rosa", de Judith Kerr, unha noveliña sinxela pero apaixoante, que nos fixo compartir as tribulacións da protagonista, Anna, e a súa familia cando se ven obrigados a abandonar o seu fogar en Berlin, fuxindo da expansión do nazismo nos anos previos ó estoupido da 2ª Guerra Mundial. Unha noveliña moi recomendable, de fácil lectura, que nos acercou ás experiencias vitais dunha familia xudea obrigada a deixar atrás todo o que aman (liberdades, familia, amizades...) "

Saramago, sempre Saramago

2011-12-05T12:34:00.003+01:00

Recollido do blogue do club de lectura "Ao Pé da Letra" do IES Cidade de Antioquia

"¿Por qué los lectores de un libro que se conocen y viven más o menos cerca no se reúnen para hablar de ese libro después de haberlo leído? ¿Por qué tiene la lectura que ser siempre una actividad solitaria? ¿Por qué no un intercambio entre lectores y libros? ¿Por qué no hablar de un libro que se acaba de publicar o de un libro que forma parte de nuestra cultura y de nuestra educación sentimental? Esto sería fomentar de verdad la lectura en el lector mismo, en lugar de caer en la ambición quizá desmedida de poner a todo el mundo a leer. Se puede hacer de la lectura algo distinto a un placer solitario, que lo es también, y en primera instancia. No propongo un sistema colectivista sino la acción dinámica que supone el intercambio de ideas u opiniones sobre el libro. Porque el libro es algo más que un objeto que se coloca en la estantería para no volver a él, resulta que el libro es una plataforma de comunicación entre personas,..."
José Saramago.
El libro de cada día

VOLVEMOS RENOVAD@S

2011-12-02T10:18:00.005+01:00

Así o conta o Club de lectura Alobre do IES Castro Alobre.

Así o demostra o Club Ao pé da hortensia do IES de Melide, que vai a todo lume traballando cómic e novela gráfica, con obras tan interesantes como Arrugas, Las célticas, Os catro grandes, A noite das cacharelas, A biografía gráfica de Ana Frank, Los ojos de la tormenta, Pafman, Mortadelo e Filemón, Os dentes do dragón, A maldición dos Velasco, Asterix y la gran zanja, Nana 1, ...

CLUBS de le ctura nos CFR (2)

2011-12-01T15:10:00.004+01:00

O CFR de Ferrol conta co club de lectura Teachers by Day.
Xa comezaron a súa andaina anual...
Así nolo contan:
"O próximo xoves, día 24 de novembro retomamos as reunións do club de lectura en inglés Teachers by Day. Se están interesados en formar parte do club de lectura, por favor contacten coa asesoría de Linguas Estranxeiras."

CLUBS DE LECTURA NOS CFR

2011-11-24T14:44:00.005+01:00

En Pontevedra, continúa reuníndose "A pregunta do cuco", no CFR.
Xuntanzas de profesorado arredor dos libros, nun lugar común e de formación. Reunirse para falar de libros e de lecturas, que mellor lugar que un Centro de Formación e Recursos?
Atoparanse, de novo, o xoves 1 de decembro, apúntase alguén máis?

OS CLUBS ... VIAXAN

2011-11-23T10:04:00.007+01:00

Coa escultura a Manuel María

Os clubs de lectura viaxan con motivos literarios. Realizan roteiros xa marcados ou creados para a ocasión.

Recollemos unha destas viaxes. O Club de leóns do CPI Cernadas de Castro de Lousame percorreu o curso pasado as terras de Monforte, os lugares de Lois Pereiro.

Así nolo contan...

"O sábado 7 de maio o club de lectura de adultos e rapaces "A lus de San Finx" levamos a cabo un roteiro literario por Monforte de Lemos. Imos contarvos que sucedeu:
Saímos de Lousame ás 9:30 e o día non deixaba lugar a dúbidas do que meteorolóxicamente
nos iba acompañar: a choiva... e claros ás veces...
Cando chegamos a Monforte o tempo apiadouse un pouco e aínda que con bos refachos de vento
deixounos admira unha perspectiva xeral da cidade de Monforte ...

O club visita ao autor

2011-11-22T00:15:00.006+01:00

Hai veces nas que son os clubs os que se desprazan para visitar a un autor no seu propio medio, na súa casa, na súa Fundación...

Así se recolle no blogue "A praia das palabras" do club de lectura do IES de Vilalonga, a súa visita a Neira Vilas, no ano en que se cumpren cincuenta anos da publicación das Memorias dun neno labrego.

Desta maneira puderon aproveitar para coñecer os lugares do autor e percorrer a comarca do Ulla, pasando polo pazo de Oca, a fervenza da Toxa, as illas de Gres...

Unha suxestión desde o club de lectura do IES Pazo da Mercé

2011-11-17T17:56:00.001+01:00

Leonor, a coordinadora do club de lectura do IES Pazo da Mercé (As Neves, Pontevedra), achéganos unha proposta que publicamos aquí nas súas palabras:

Son Leonor Giménez, coodinadora do Club de lectura do IES Pazo da Mercé en As Neves, provincia de Pontevedra.Teño unha suxerencia para maximizar as adquisicións de lotes de libros dos diversos clubs de lectura de Galicia. Gustaríame que se fixera un chamamento aos diferentes clubs para que enviasen ao blog de "libros a eito", os títulos dos libros que utilizaron no curso pasado e o número de exemplares.

Agardamos os vosos listados para publicalos en LIBROS A EITO, tal e como se solicita desde este club. Lembramos o enderezo ao que dirixirse cos listados ou cos lotes de libros que se ofertan en préstamo: bescolares@gmail.com

REUNIÓNS DOS CLUBS

2011-11-14T10:59:00.006+01:00

Pouco a pouco, e antes de saír a resolución da Convocatoria de axudas a Clubs de Lectura, vanse reunindo os Clubs.
Queremos ilustrar este feito cunha das entradas nun blogue de biblioteca.
Trátase de Biblio Tea, o blogue de biblioteca do IES Val do Tea.Así comeza a súa entrada...
"O luns 7 tivemos a reunión do “Club de lectura”. Faltáronnos algúns que estiveron con Esme ensaiando o espectáculo de títeres para as “misións pedagóxicas”, xa vos contaremos disto porque a piques están de comezar.
Algúns dos asistentes non leran o libro porque disque non o había na biblioteca cando foron buscalo. Cando sexa así, hai que insistir. Se están prestados espérase a que outro o devolva e volvese a buscar. Vedes a importancia de devolver os libros no seu prazo? Pero bueno, desta vez non valen esas excusas porque houbo libros parados alí na biblioteca días antes, bastantes días antes, da reunión.
Pero aínda así, todos asistiron ó club, comeron as súas arepas, hamburguesas, ensalada de pasta. Porque xa sabedes que as reunións do club de lectura comezan por unha sesión gastronómica. Logo de encher a barriga; acompañar o postre coa escoita do poema de Kavafis na voz de Lluis LLach e a da persoal versión de Krahe, que podedes recordar no antigo anterior deste blog; sen esquecernos de para que estabamos alí, pois non comeramos “loto” ningún de nós, nin tardamos o tempo da travesía de Ulises en comer. Despois de todo iso, quen máis quen menos deu a súa opinión sobre o inxenioso Ulises, ó que algún tildou ademais de inxenioso (iso non houbo quen de negarllo), de pouco escrupuloso e trapalleiro. Valente, tamén dicía Samuel que era, aínda que nese aspecto todos coñecemos outros heroes que o superan. Pero xa sabemos o que di o dito “máis vale maña ca forza” (...)

MEMORIAS DOS CLUBS: Frases para ... pensar

2011-11-02T11:16:00.004+01:00

Foto: tertulia en Ourense

Un club achéganos unhas citas para pensar e repensar...

“Cando transitamos polas páxinas dun libro poucas veces saímos ilesos” Mario Benedetti
“A literatura é unha defensa contra as ofensas da vida” Cesare Pavese
“Non existe forma máis nobre de pertenenza a un pobo que escribir a súa lingua” Heinrich Böll

OS CLUBS BOTAN A ANDAR

2011-10-31T08:57:00.006+01:00

Así se ve nesta entrada blogue da biblioteca do IES Pedra da Aguia, Vilán, que leva o título de "Os araos saen do cascarón".

Coma se do nacemento dunha ave se tratara, o club comeza a súa andaina. Así se pode ler
OS ARAOS SAEN DO CASCARÓN
Por fin nesta semana conseguimos que os Araos do Instituto, os membros do Club de Lectura de Alumnos, saian do cascarón. Os Araos maiores lles gañaron a partida hai uns días, pero agora xa estamos todos en marcha.
Queremos darlle a benvida aos novos araos, que pasan a formar parte do Club este curso. Os máis veteranos xa saben como vai a cousa, e digo eu que se repiten, por algo será...
Saúdos tamén a todos os lectores/as do insti (que os hai, e máis do que parece) que non están no club. Gustarianos telos con nós, pero sabemos que non sempre é posible. A porta sempre estará aberta.
Esperemos que todos poidades encher os vosos carnés cunha chea de libros que vos gusten e vos fagan disfrutar.

MEMORIAS DOS CLUBS: Ao pé da hortensia do IES de Meaño

2011-10-28T10:40:00.002+02:00

Fotografía tertulia Ourense

Do club "Ao pé da hortensia" do IES de Meaño.

“No curso 2008-09 o equipo de biblioteca creu conveniente crear un club de lectura ao que chamou “Ao pé da hortensia”, motivado polas inquedanzas literarias de parte do noso alumnado e coa intención de potenciar a lectura compartida entre a comunidade educativa, enriquecerse coas opinións alleas ou observar distintos puntos de vista dunha mesma lectura, crecer como persoas, aprender das experiencias que achegan os propios libros e adquirir o hábito de escoitar e falar diante dos demais. Este club continúa hoxe en día, incorporando ao novo alumnado que chega ao centro cada curso”.

MEMORIAS DOS CLUBS: Grupo Abeliano do IES Santa Irene (Vigo)

2011-10-27T10:51:00.003+02:00

Imaxe do IES de Mondariz

“Tratamos de apoiarnos fundamentalmente en escritores galegos ou universais traducidos ao galego para presentar cuestións e puntos de vista que os alumnos e alumnas sos non chegarían a encontrar nunca e, a partir de aí, pretendemos dialogar”.

MEMORIAS DOS CLUBS: Pantasmas de papel do IES Fernando Esquío (Neda)

2011-10-26T09:15:00.002+02:00

Foto do club de lectura do IES Monelos (A Coruña)

Falando arredor do que se atopa nos libros
“A droga da obediencia de Pedro Bandeira, autor portugués que os leva a pensar no mundo no que vivimos: “Non hai escravo máis desgraciado e servil que aquel que non é consciente da súa situación e crese libre. Non hai dominador máis poderoso que aquel que goberna a tales súbditos”. Baixo esta idea reflexionamos si somos libres ou ben estamos mediatizados por sutís mensaxes políticas, consumistas, hedonistas, e vivindo nun soño dirixido por un grupo de poder... algo moi de actualidade. (...)
En relación ás Xornadas Literarias que organiza a Universidade da Coruña e o concello de Neda, desde hai dez anos, dedicadas en cada ocasión a un autor. Desde que hai club de lectura, son os membros dun dos grupos os que fan a recensión do autor e a sesión do club en público xunto cos especialistas sobre o autor ou autora. .Neste caso tratábase de Fiodor Dostoievski; leron El jugador e comentaron as súas impresións co público asistente, e realizaron unha exposición da vida do autor mediante un power point e unha liña do tempo virtual empregando Dipity”.

MEMORIAS DOS CLUBS: Club de lectura do IES de Foz

2011-10-24T12:24:00.003+02:00

Imaxe do Club de lectura do CEIP Figueiroa (A Estrada)

Do Club de lectura do IES de Foz
“Resultou especialmente emocionante o testemuño dunha das alumnas, quen nos contou como fora lendo en voz alta e paseniño as Memorias dun neno labrego para compartilas coa súa avoa analfabeta, pero entusiasmada ó identificarse coas andanzas de Balbino.
(...)
Por conseguinte, tendo en conta os obxectivos marcados no proxecto do Club de lectura, consideramos que o resultado da actividade é moi satisfactorio en canto cumpre a finalidade de fomentar a lectura, contribuíndo a crear un ambiente lector no centro; consegue motivar para compartir as experiencias sobre as distintas lecturas e mesturar a aprendizaxe co debate entre os participantes; ademais, contribúe á mellor comprensión lectora dos alumnos en xeral e á mellora da calidade educativa. Por se fose pouco, vese que tamén tende pontes interxeracionais.”

MEMORIAS DOS CLUBS: Tesmoitoconto do CPI A Picota (Mazaricos)

2011-10-21T12:13:00.003+02:00

“Despois da lectura dos libros, e coincidindo coa chegada do Nadal decoramos o que se deu en chamar “A árbore da sabedoría” posto que a enchemos coas citas que máis nos chamaron a atención dos libros que estabamos a ler no Club de Lectura. Con este feito intentamos facer partícipe ao resto do centro do que estabamos a facer dende o Club, ao tempo que lles achegamos frases dos libros que liamos.
(...)
Un dos expositores da biblioteca empregouse para expoñer e resaltar exemplares dos libros seleccionados para o Club de lectura. No taboleiro de información lectora o alumnado e profesorado daba a súa opinión sobre algún libro lido, como suxestión para outros posibles lectores. Este estaba situado a carón da biblioteca, aínda que na parte exterior para poder ser visto, tamén, polos que non adoitan entrar na biblioteca. O blogue da biblioteca tamén recollía información periódica sobre os libros do Club e outras actividades que desde aí se realizaban”

MEMORIAS DOS CLUBS: Club di lettura da EOI de Ribadeo

2011-10-20T11:43:00.003+02:00

Club di lettura do departamento de italiano da EOI de Ribadeo
"Ás sesións acoden regularmente nove persoas, entre eles alumnos/as actuais e antigo alumnado. No caso destes últimos, o club é o único vínculo que lles queda coa escola e a lingua.
Conseguiuse crear un clima distendido no que a diferenza das clases non se corrixe, converténdose o profesor no moderador dunha conversa na que se intercambian opinións.
Na selección de lecturas trátase de alternar clásicos da literatura italiana, con autores e autoras que nestes momentos están sendo importantes en Italia; da mesma maneira se combinan xéneros desde a novela policíaca á lectura de divulgación ou algunha que entrañe dificultade desde o punto de vista lingüístico ao reflectir a diversidade lingüística do país.
Para difundir a actividade fanse uns marcapáxinas que se agasallan ao alumnado e se reparten na libraría de Ribadeo".

MEMORIAS DE CLUBS: CPI San Vicente (A Baña)

2011-10-19T13:44:00.003+02:00

A modo de avaliación
“Os aspectos máis negativos do club de lectura foron a lentitude de velocidade lectora dos alumnos ou a falta de compromiso para traer lido o libro na data suxerida, o que impedía facer as reunións coa periodicidade fixada, para comentar entre todos o libro; a dificultade de encontrar títulos que enganchen a todos (en 2º provocou o abandono dun par de libros, respectando o principio do club de lectura: disfrutar coa lectura... en non acabar sendo “o clube da tortura”... pero tamén abandonaron varios alumnos, o que consideramos un pequeno fracaso. (...)
O mellor, a colaboración co Concello da Baña, e coa responsable de Normalización, que mediante a páxina web do concello impulsa a lectura en colaboración cos fondos da biblioteca do centro e as suxestións de lectura deste club”.

MEMORIAS DOS CLUBS: Liñas de fuga do IES Macías o Namorado

2011-10-18T10:30:00.004+02:00

“O achegamento á poesía foi potenciado –do mesmo xeito que o fixemos o curso anterior- mediante o desenvolvemento dunha actividade adicional, o Obradoiro de Creación e Debate Liñas de Fuga, impartido pola mesma profesora encargada polo Club de Lectura. (...)
Este curso decidimos comezar por tratar o tema do amor a fondo, dende distintas perspectivas, empregando diferentes fragmentos de épocas variadas.
Os textos escollidos foron estes:
-Elogio de la mujer chiquita, do Libro de Buen Amor
-Un soneto de Lope. “desmayarse, atreverse, estar furioso...”
-Un soneto de Avilés de Taramancos: No fondo dos teu sollos, na devesa perdida...
-Un poema de Martín Niemöller: Cuando los nazis vinieron a por mi.
-Un fragmento de “El amor cristiano” de Pablo (Carta al os Corintios,13): “(...) El amor es paciente y bondadoso; no tiene orgullo ni jactancia...”
Intentamos, con estes fragmentos, rompe ros esquemas que sobre este sentimento tiña nas nosas alumnas que o asocian sempre as ideas románticas, coa felicidade ou co malestar que dea í puidesen, segundo elas crían, derivar”.

MEMORIAS DE CLUBS: Club de lectura Sansaliber do CPI de San Sadurniño

2011-10-17T11:09:00.003+02:00

Do club de lectura Sansaliber do CPI de San Sadurniño
"Entre os resultados obtidos figuran os seguintes:
-Contribución á socialización dos alumnado que compartíaa s súas opinións e gustos, aproximándose de maneira respectuosa ás dos outros.
-Fomento e consolidación do hábito lector, valorando especialmente a participación do alumnado de PDC.
-Maduración lectora, xa que adquiriron ou melloraron os seus criterios de selección persoais.
-Valoración da lectura como unha actividade axeitada para o tempo de lecer.
-Familiarización do alumnado cos blogues culturais e as formas de literatura asociadas ás novas tecnoloxías.
-Difusión da percepción da biblioteca como un centro de animación cultural”

MEMORIAS DOS CLUBS: As pintoras daltónicas do CPI dos Dices (Rois)

2011-10-14T09:07:00.006+02:00

Imaxe: Club de lectura "A lus de San Finx". CPI Cernadas de Castro. Lousame

“O curso 2010-2011 foi o cuarto de funcionamento do noso club de lectura, que se rexeu polas pautas establecidas nos cursos anteriores. Téndomos en conta que concibimos o club como un proxecto plurianual –e esperamos que definitivo no noso centro- no que o alumnado pode entrar ao inicio do seu ensino secundario obrigatorio –mesmo no último ciclo de Educación Primaria- e continuar no club ata que abandona o centro, en 4º de ESO.”
(...)
“O noso obxectivo segue a ser obvio e modesto: gozar coa lectura. Atémonos incondicionalmente a esta única norma do noso club e considerando que a pertenza a el é absolutamente libre e voluntaria –e que tamén o é a participación nas actividades paralelas- axúdanos a conseguir es ameta. Por suposto, a través dese goce ímonos facendo lectores cada vez máis conscientes, máis esixente se máis críticos.”
Entre os seus obxectivos, recollemos “Compartir intereses e preferencias co resto da comunidade escolar a través dos videos elaborados, do blog da biblioteca, da revista escolar e do blog do club de lectura”, “Manter un contacto continuado co mundo do libro non só a través das lecturas senón tamén do cine, a música, os/as autores/as, os espazos... “, “Facer todo o anterior nun ambiente agradable, distendido e agardado polas integrantes, no que este ano as lambetadas propias e alleas gozaron dun lugar destacado.”
“Agasallámolos cun bolígrafo e un caderno (a cada un dos integrantes do club), para que se acostumasen a tomar notas cando len e, sobre todo, para facer incidencia na conciencia de grupo; para que se sintan como un colectivo con identidade propia”.

MEMORIAS DOS CLUBS: Nautilus do IES Fernando Blanco (Cee)

2011-10-13T09:44:00.002+02:00

“As xuntanzas sempre se celebran na biblioteca xa que deste modo facemos visible o club ao resto da comunidade escolar. En canto á moderación pretendemos que sexa sutil e apenas se note pois preferimos que espontaneamente xurdan os temas e que sexa o alumnado o que tome a palabra, se ben son moi enriquecedoras para todos as intervencións do profesorado que coñece en profundidade a obra que estamos a ler igual que ao seu autor/a, e mediante preguntas ou reflexións fan que o resto dos membros do club vexan algúns aspectos da obra que igual se lles escaparon na lectura individual.
(...) Na Ensinanza Secundaria de Adultos, na materia de Oferta Propia do Centro “Reflexións a través do cine e a lectura” decidiuse incorporar a actividade do club de lectura, aproveitando para formar diferentes clubs. Completábase a actividade co visionado de diversos filmes. As obras escollidas foron O neno do pixama de raias, O home que plantaba árbores, Historia de una gaviota y del gato que le enseñó a volar e Enderezo descoñecido."

MEMORIAS DOS CLUBS: Club Marela do IES As Bizocas

2011-10-11T09:24:00.004+02:00

"Despois de ler o relato “Un río de palabras” de Agustín Fernández Paz decidiuse facer anuncios para publicitar os libros que máis lles gustaban e colocalos pola vila.
”Nas primeiras reunións elaboráronse uns marcapáxinas en colaboración co departamento de Plástica. Neles aparecían as fotos dos membros do club de lectura coma se fosen follas dun libro desprendéndose ao poñelo boca abaixo. Tivo tal éxito o marcapáxinas que todos querían un similar. Por iso, fixéronse dous xigantes e un está no lugar reservado para as reunións na biblioteca e o outro na sección da biblioteca onde se sitúan os materiais adquiridos polo club.” (...)
“Os integrantes do club de lectura asisten a todas as reunións con autores, talleres... que se organizan no centro como un medio de premiar a súa implicación na vida e dinamización do mesmo”.

ENTRE MEMORIA E MEMORIA... un comezo

2011-10-10T08:53:00.007+02:00

Recollémolo do club de lectura "Libros de peto" da biblioteca do IES de Ponteceso e di así:

"Un ano máis o club de lectura LIBRO DE PETO do IES Ponteceso, convócavos á primeira reunión arredor dunha cunca quentiña de chocolate , unhas cantas pastas e moitas ideas para ler neste curso.
Como é xa habitual formaremos tres grupos de avezados lectores: Os de 1º e 2º de ESO, os de 3º e 4º e, por último , os Bacharelatos e aínda que o ano pasado lles puxemos nomes, e incluso logos, estamos abertos a calquera tipo de cambios, suxestións, ideas …
Queremos ler, pasalo ben e compartir, así que esperámosvos o vindeiro 14 de outubro no recreo e na biblioteca.
Feliz chocolatada e… boas lecturas!!!"

Ganas dan de ir ata alá

MEMORIAS DOS CLUBS: IES Ribeira do Louro

2011-10-07T10:25:00.003+02:00

Das conclusíóns:
“É unha actividade gratificante para todos: profesorado e alumnado; houbo un ambiente distendido, compartiamos gustos literarios e o pracer de ler e amosar diferentes aspectos que nos libros algún de nós, descubría. Unha mostra do seu interese pola actividade era que o alumnado lembraba ao profesorado os horario se datas de reunión.”

MEMORIAS DE CLUBS: EOI de Santiago (2)

2011-10-06T14:40:00.004+02:00

“Durante esta primeira sesión tamén se presentou a actividade “Me and my shelf” na cal os alumnos/as terían que fotografarse coa súa biblioteca ou libro preferido. Esta actividade foi especialmente boa para que os membros do club descubriran gustos e tamén para dar a coñecer ao resto do alumnado e á comunidade educativa os integrantes do club, xa que se expuxeron no centro”

MEMORIAS DE CLUBS: EOI de Santiago

2011-10-05T10:09:00.005+02:00

“Houbo unha suxestión a respecto de poñerse en contacto con outras EOI ou bibliotecas que teñan clubs de lectura en linguas estranxeiras para poder prestarlles os nosos libros e pedir a cambio que eles nos presten a nós os que teñen.
Tamén se propuxo a posibilidade de dar maior proxección ao club de lectura enmarcándoo nas accións do Proxecto ARCE, traballando en cooperación con Escolas Oficiais de Idiomas doutras comunidades autónomas”

MEMORIAS DOS CLUBS: IES Manuel Antonio (2)

2011-10-04T08:48:00.005+02:00

“Do mesmo xeito que os cursos anteriores o club está dirixido a toda a comunidade educativa, e aberto ás persoas do entorno do centro, persoal non docente, alumnos do Centro Residencial Docente e ás persoas maiores da residencia próxima. Falamos coas asistentas sociais da Residencia de Persoas Maiores para continuar traballando con eles do mesmo xeito que o pasado curso. E tivemos unha reunión coa presidenta da ANPA para que dese a coñecer o club na seguinte reunión de pais/nais.
Os folletos informativos coas características e obxectivos do club, normas para asociarse e xeneralidades sobre o funcionamento do mesmo, que conteñen tamén a ficha de inscrición son os mesmos de anos anteriores.”

MEMORIAS DOS CLUBS: CPI San Vicente (A Baña)

2011-10-03T08:52:00.004+02:00

Falando de colaboración...
"O grupo de adultos coordinados polo departamento de Normalización Lingüística do Concello da Baña, empezaron timidamente a súa andaina con Cartas de inverno de Fernández Paz, para continuar con Doce badaladas de Suso de Toro. Para o verán continuarán con O señor Ibraim... prestado pola biblioteca do centro, xa que os títulos anteriores foran prestados pola biblioteca do concello. Ao saber da súa existencia decidimos aunar esforzos e rendabiblidade. esperando colaborar o próximo curso, quizais cun fío temático sobre a guerra civil, con obras como A lingua das bolboretas ou O lápis do carpinteiro, de M. Rivas, pretendendo aproveitar a experiencia dos maiores e relacionalos cos pequenos."

MEMORIAS DOS CLUBS: Le+ do IES Manuel Antonio

2011-09-30T15:28:00.004+02:00

“Xa desde principio de curso se comezou a facer publicidade do Club de lectura entre o alumnado e o profesorado.
Grazas ás reunións de coordinación, ás que ademais dos membros do grupo de biblioteca asiste o xefe de estudios e a vicedirectora do centro, a coordinadora do club tivo a oportunidade de asistir a unha das reunións de titores de ESO e bacharelato e alí dar a coñecer as experiencias do club, para que todos os titores puideses transmitira información aos seus alumnos e alumnas.
Ao resto do profesorado deixóuselles a información nas súas correspondentes “taquillas” e colocáronse carteis nos lugares máis destacados do centro. Esta información presentouse nun power point na entrada principal do instituto xunto con outra publicidade da biblioteca.
Tamén se enviou unha carta da Dirección do centro ás familias, informando da posibilidade de formar parte do Club.”

MEMORIAS DE CLUBS: O club Fraga do Novio do IES de Porto do Son

2011-09-29T09:13:00.005+02:00

“O 5 de novembro o club de lectura compartiu unha saída conxunta cos clubs “As Campaíñas” do CP Ide Cuntis, “iESCALasletras” do IES Aquis Celenis de Caldas, “As Portadas” do CPI Domingo Fontán de Portas e “Na Estrada – 525” do IES Manuel García Barros da Estrada. Seguindo coa temática das historias de medo e intriga á que lle dedicou a biblioteca o primeiro trimestre, cada club participante representou relatos de terror á tardiña no mosteiro de Carboeiro, onde tamén tivemos ocasión de escoitar as historias de Celso Fernández Sanmartín.”

MEMORIAS DE CLUBS: María Castaña do IES de Sabón

2011-09-28T08:56:00.003+02:00

O club María Castaña, tamén é moi visible na realización das exposicións: “Libros de guerra” ou “Libros con corazón”, realizadas con materiais da propia biblioteca; e tamén, da exposición de fotografías realizadas imitando portadas de libros ás que se acompañaba das obras orixinais ...

MEMORIAS DOS CLUBS: IES de Catabois (2)

2011-09-27T08:55:00.004+02:00

Do Club Xuvenil do IES de Catabois
“Cada membro do Club está invitado a traer ás reunións calquera párrafo, verso, estrofa ou artículo que queira compartir cos demais membros para o seu comentario ou simple desfrute. Esta foi unha proposta de gran éxito, sobre todo nos primeiros meses, e da que saíron moi interesantes lecturas e charlas. Consideramos que é, ademais, moi importante de cara á práctica da lectura en público e en voz alta. E por outra parte, o alumno/a síntese escoitado nos seus intereses, e valorado polos mesmos, animando así a outros a facer o mesmo e movendo a reflexión, non só estética ou literaria, senón tamén filosófica ou social.”

"Maneras de leer"

2011-09-27T08:47:00.007+02:00

A Asesoría de bibliotecas escolares estivo en Madrid os días 20 e 21 de setembro, no congreso Maneras de leer, organizado conjuntamente polos ministerios de Educación e Cultura. Fóramos convocadas a participar coa experiencia dos clubs de lectura en centros de ensino secundario de Galicia, unha iniciativa que está a chamar a atención a todos os que, desde o mundo da lectura, se achegan a ela. Alí estaban tamén as compañeiras que participan no programa ARCE, compartindo experiencias lectoras desde os seus clubs en diferentes recunchos do Estado: Murcia, Tenerife, Madrid e Galicia. Velaquí a súa propia crónica do que alí pasou, no blog que comparten En el país de Alicia.
A delegación galega non era pouca: ademais de Anxos, a coordinadora de As zocas faladoras, estaban presentes os compañeiros Rafa e Cris, do CEIP de A Lama, e as coordinadoras das bibliotecas do CPI de Catoira, Nine, e do IES Ribeiras do Louro, Paz.
Maneras de leer permitiunos coñecer experiencias do ámbito da lectura pública e do ámbito do ensino, espalladas por todo o territorio do Estado. Permitiunos, así mesmo, reencontrarnos con amigos xa das bibliotecas escolares galegas, como Carmen Carramiñana e Merche Caballud, mestras e amigas, que desde o seu Leer juntos, tanto e tan ben nos teñen acompañado en distintos encontros e xornadas.

MEMORIAS DOS CLUBS: IES de Catabois

2011-09-26T08:36:00.003+02:00

“O Club representa unhas das accións máis importantes da biblioteca, posto que intenta abrir as súas portas a todo o persoal do centro e ademais a membros das asociacións de veciños do entorno, ex alumnos, etc., obedecendo ao concepto de acceso á lectura de todo o colectivo, estendendo as súas actividades máis alá das accións netamente académicas.”

MEMORIAS DOS CLUBS: Colegas das palabras do IES Julio Prieto Nespereira

2011-09-22T11:53:00.004+02:00

“A satisfacción do grupo queda explícita na constancia: un grupo de “colegas” levan dende o principio, sempre colaboran nas actividades dinamizadoras e normalizadoras do centro ademais das especificamente pertencentes ao club de lectura. Isto fai que a miña satisfacción sexa grande. Levo comigo intercambio de aprendizaxes e experiencias e unha relación humana moi especial e gratificante.”

MEMORIAS DOS CLUBS: Camiños do IES Luís Seoane

2011-09-19T09:50:00.018+02:00

Do club de lectura do IES Luís Seoane

Recollemos dunha escolma de reflexións colectivas realizada a final de curso:
“Aquí, entre todos os que estamos, descubrín que a lectura me fixo distinta. Non digo que mellor, só distinta e capaz de comprender moitas cousas que non comprendía”.
“O impulso do Club de Lectura fíxome capaz de compartir coa miña nai lecturas. Ela sempre foi afeccionada á lectura e sentíase doída porque eu lía pouco. Agora está moi contenta e eu tamén.”
“Aquí todo son gabanzas pero moitos seguimos sendo tan vagos coma sempre. A min sempre me gustou ler pero non estudar e segue sen me gustar.”

Así se nos explica a razón do nome:
Camiños recibe o seu nome da convición de que “os libros abren mil camiños, camiños que nunca se acaban, e polos que se debe viaxar, poñer as pegadas nas páxinas que marcan os rumbos e os sendeiros que levan a todos os países, a todas as almas e a todas as situacións imaxinadas e contadas."

MEMORIAS DOS CLUBS: TUGA - LENDO - LUGO

2011-09-16T09:41:00.004+02:00

Entre os desafíos para o próximo curso, o club TUGA – LUGO – LENDO proponse enviar un correo a todos os departamentos de portugués das EOI para animalos á creación de clubs de lectura en portugués, e de ser posible, tentarán establecer contacto con algún club de lectura en Portugal, co que se reunirían para debater arredor dunha mesma obra.
Parabéns pola claridade da mirada e ánimo para percorrer ese camiño!

MEMORIAS DOS CLUBS: As catro esquinas do quinto

2011-09-15T14:09:00.004+02:00

En “As catro esquinas do quinto” coméntase
“(...) Este ano non puidemos asistir ás Xornadas – terapia (por causas totalmente alleas) que sempre traen un pouco de ánimo, moitas ideas e sentimentos de grupo, folgos tan necesarios para poder seguir adiante. Pero o certo é que,este ano,a nosa actitude de ánimo débese aos rapaces. Son eles os que nos fixeron non dubidar do noso traballo.
Explícome. Todo comezou o último día de curso 2009-2010, cando levamos aos máis pequenos do club á praia. Non se me pode esquecer o seu descaro ó ler, en medio dunha praia chea de xente, os seus poemas preferidos do mar (alucinante as súas escollas). Xa de camiño á casa, dinme conta do moito que merecían eses rapaces e rapazas que xa falaban emocionados dos proxectos do curso seguinte: se facer teatro, se ler non sei que cousa, se ir non sei onde a ler non sei que... Eles estaban a organizar de novo algo que nós,neses intres,pensabamos que se estaba a desfacer. E o certo é que eses pequenos demostraron este curso que non facían castelos no aire naquel autobús de volta da praia, levaron a cabo moitas das súas ideas, currando, lendo, falando..., un grupo excepcional. (...)
(...) non tivemos que tirar do club, o club tirou de nós. Parece que a semente está a dar un bo froito.”

MEMORIAS DOS CLUBS: Covaterreña

2011-09-14T12:22:00.006+02:00

O Club Covaterreña ten como obxectivos:
- Fomentar o hábito lector entre o alumnado
- Aumentar o pracer da lectura mediante a comparación e contraste da experiencia lectora
- Impulsar o interese por expresar as ideas e sentimentos propios nacidos da lectura de distintos textos.
- Potenciar a capacidade crítica e argumentativa diante doutras persoas mediante o comentario dirixido.
- Apreciar o valor estético da literatura e a súa función como vehículo transmisor de ideas, coñecementos e expriencias.
- Ampliar a riqueza expresiva no ámbito da oralidade.
- Utilizar a biblioteca como lugar de convivencia.
- Utilizar as TIC para crear e interpretar textos.
E, a modo de conclusión,... “o club funcionou como un elemento integrador para alumnado de diferentes niveis educativos”.

MEMORIAS DOS CLUBS DE LECTURA: Fendetestas (2)

2011-09-13T13:14:00.005+02:00

Os obxectivos que se pretendían acadar eran no club:
- Suliñar o carácter socializador e lúdico da actividade de ler e de falar sobre o que se leu.
- Contribuír, con iso, á formación integral dos individuos lectores.
- Perfeccionar as súas competencias básicas.
- Fomentar o traballo coas habilidades comprensivas, expresivas e documentais.
(...)
E xa para rematar, unha vez máis, os profesores que organizamos a actividade do club de lectura Fendetestas queremos deixar constancia do que nos fai medrar, non só como profesionais, senón como persoas, a participación nesta comunidade na que o interés común é ler para compartir, para coñecer e para coñecerse mellor. Sobre nós sobrevoa a voz do irrepetible Borges, quen con acerto dicía: “Uno llega a ser grande por lo que lee y no por lo que escribe.”

MEMORIAS DOS CLUBS: Fendetestas do IES de Curtis

2011-09-12T09:25:00.004+02:00

“O proxecto funcionou desde outubro de 2008 e segue medrando día a día, con membros xa veteranos e con outros que recibimos con ilusión cada curso. Certo é tamén que non todos os que suben a este tren viaxan ata a última estación: algúns apeáronse no medio do traxecto, pero tamén cómpre dicir que ao baixar uns, outros novos viaxeiros subiron ao vagón da lectura.”

MEMORIAS DOS CLUBS: Siareiros das palabras do IES Pedras Rubias

2011-09-09T10:26:00.003+02:00

"En canto aos obxectivos, temos contribuído a crear hábitos lectores, a traballar a lectura en diferentes soportes e a relación entre as diferentes linguaxes, a mellorar a comprensión lectora e a adquirir as competencias lingüísticas mediante a ampliación de vocabulario, dos estilos de escrita, dos xéneros, da dramatización, da lectura individual e compartida; a aprendizaxe de apuntes soibre as lecturas... Tamén temos conseguido unha maior formación cultural, estética e artística, así como a autonomía e a iniciativa persoal, ao tratarse dunha actividade optativa e voluntaria."

MEMORIAS DE CLUBS: Na Estrada - 525 (2)

2011-09-08T10:40:00.003+02:00

Primeira reunión. Cuestións prácticas.

“A primeira reunión foi extraoficial, para informar aos lectores interesados en continuar no club, dos requisitos que debían reunir os posibles candidatos a formar parte del, as vías polas que se lles convocaría e outras informacións de tipo organizativo. Nesta primeira reunión solicitóuselles que cubrisen unha folla preparada para tal fin cos seus datos (idade, curso, correo electrónico, DNI, preferencias lectoras), xustificándolles esta petición. Despois presentámonos oralmente todos/as e, en vez de explicar as súas preferencias lectoras como se lles solicitara, falaron das razóns polas que se integraron no club. Moitos xa formaran parte del en cursos anteriores e fixeron un resumo da súa andaina para os novos.
(...)
Posto que as reunións se celebrarían fóra do horario lectivo, entregóuselles unha folla para que a cubrisen os seus titores legais, e coa que os autorizaban a participaren nesta actividade.
Nesa primeira reunión tamén se lles amosou o blog do noso Club. (....)
Regalóuselle a libretiña a cada un dos participantes para que fosen tomando note das súas descubertas, dos proxectos de lectura, dos borradores para os comentarios no blog..."

MEMORIAS DE CLUBS: Na estrada - 525

2011-09-08T09:08:00.002+02:00

“Nas reunións pretendemos que os participantes falaran libremente da súa lectura, das inquedanzas espertadas, da súa crítica; incentivamos que se contrapuxesen opinións sobre unha mesma obra, que abrisen perspectivas de interpretacións diferentes, que relacionasen esa obra con outras anteriormente lidas, que discutisen sobre versións dun mesmo título en diferentes soportes entendendo as linguaxes propias de cada un ...
(...)
A comodidade coa que se sentían todos os membros dentro do club posibilitou comentarios moi persoais e interesantes sobre a experiencia lectora e a personalidade de cada un de nós. Ao final, todos e cada un dos participantes coñecían os gustos e preferencias dos demais."

MEMORIAS DE CLUBS: O Segrel do Penedo (2)

2011-09-07T10:54:00.005+02:00

Tamén do Segrel, a respecto da colaboración co n outros centros:
“Este curso, o mesmo que os pasados, seguimos a utilizar o servizo de préstamos interbibliotecarios a través de “Libros a eito” con distintas bibliotecas escolares como o CEIP Recimil (ferrol), CEIP Os Casais (Fene), CEIP O Ramo (Fene), CEIP Centieiras (Fene), IES Catabois (Ferrol), IES Sofía Casanova (ferrol), IES Fernando Esquío (Ceda), IES Pedra da Aguia (Camariñas), IES de Mugardos (Mugardos), IES Vilar Ponte (Viveiro e IES Neira Vilas (Oleiros).
Quixéramos facer fincapé no positivo desta experiencia, porque non só se trata de optimizar recursos, co que isto implica de darnos a posibilidade de facer máis lecturas das que nun pricipio nos permiten os fondos obtidos a través da convocatoria de Clubs de Lectura, se non que nos dá a oportunidade de compartir lecturas con membros de clubs amigos e mesmo de organizar actividades conxuntas ou paralelas.”

MEMORIAS DE CLUBS: O Segrel do Penedo

2011-09-06T10:40:00.006+02:00

"Como esquecer…
A marabillosa carta de despedida da avoa que formaba parte do club e que o abandona por motivos de saúde.
O feito de ser os “culpables” de que nais e fillas poidan compartir gustos, espazos, momentos…
“Normalmente é ela quen me recorda que teño club de lectura e teño que darlle explicacións se por algún motivo non podo asistir. Sempre me comenta o que fan el@s no seu”
O orgullo de ser os artífices de que algúns dos membros do club lean en galego.
“Perderllo o medo a ler unha obra en galego”; a partir de aí, decidiu matricularse nun curso de galego “para poder ler as novelas sen dificultade”.
Que algúns dos membros do club se acheguen a obras que noutras circunstancias nunca terían lido.
“Facer lecturas de libros que nunca se me ocorrería ler”
Que haxa quen se engancha á lectura de tal xeito que…
“Anteriormente non. Agora mesmo participo noutro club de lectura na biblioteca de Ares, que tamén é moi interesante.”
Que haxa quen consigue, a través do club, poder compartir gustos e afeccións.
“Sobre todo compartir cos demais o gusto pola lectura, cousa que no meu ambiente habitual non acostumaba facer.”
O feito de que o nosos club sexa quen de facerlle perder público á TV.
Que pais e nais asuman que formar parte do club é un xeito de implicarse na vida do centro.
(…)"

Tal como pode lerse na avaliación do club que se recolle na entrada do seu blogue

Memorias de clubs de lectura: Balbordo

2011-09-05T11:21:00.021+02:00

Do apartado de conclusións, recollemos:

"Como moderadora de Balbordo, por cuarto ano consecutivo, teño que indicar que é unha experiencia "agotadora", que supón un gran esforzo organizativo e persoal de "gasto de enerxías" pero sen dúbida constitúe un privilexio escoitar e ver as caras de tanta e tanta xente que se emociona coa lectura. Neste sentido, en Balbordo somos moitas persoas, moi diversas, as que pensamos que é un bo modo de abrir camiño á lectura... A implicación da comunidade educativa, creo que é extraordinaria e a resposta e apoio dos compoñentes de Balbordo, inmellorables. (...) Debo agradecer as axudas recibidas para que estes proxectos poidan continuar funcionando. Aínda que existen fórmulas que facilitan o intercambio de libros entre centros, sen dito apoio económico, a organización e continuidade dos Clubs nos que se desenrolan varios proxectos ao mesmo tempo, cada mes, non poderían ser levados a cabo cunha mínima garantía de éxtio e seriedade, dado o inmenso esforzo de artellar variables actuacións sen contar cun respaldo económico.

Continúo a crer firmemente (coa perspectiva que ofrecen xa 4 anos de esforzo continuado) que as actuacións de Balbordo contribúen a asentar e potenciar o ambiente lector que sempre procuramos se respira no noso centro."

Convocatoria en apoio dos Clubs de Lectura - 2011/2012

2011-09-01T14:41:00.003+02:00

O Portal Educativo da Consellería de Educación e O.U. publica, con data 1 de setembro, a convocatoria da Dirección Xeral de Centros e Recursos Humanos destinada a incentivar a actividade dos Clubs de Lectura en centros públicos de ensino secundario, correspondente ao curso 2011/2012, no contexto do programa HORA DE LER, para o fomento da lectura en centros de ensino. O prazo de presentación de documentación remata o 20 de outubro.

ACCESO Á CONVOCATORIA

Da memoria dun club de lectura

2011-07-21T09:27:00.025+02:00

A educación impregnándoo todo...
"(...) O elemento gastronómico, o doce caseiro compartido ao comenzo das xuntanzas, continúa tendo a súa importancia na dinámica dos clubs, e xa empezamos a poensar en elaborar o noso recetario de sobremesas para clubs. A modo de anécdota comentar que este curso unha das nenos dos clubs era celíaca, polo que tras a primeira xuntanza na que descoñecíamos ese feito, pasamos a aportar doces sen gluten e a descubrir a grande variedade de posibilidades que podíamos ofertar. Foi moi gratificante para esta nena e moi interesante para todos os demais. Nas comidas dos clubs adoptouse de xeito espontáneo o costume de que sexan os nenos ou as nenas, e non as profesoras, quen aporten os doces. Queremos destacar o valor destes pequenos detalles no funcionamento dos clubs, pois lles confiren ese carácter de complicidade, de grupo de iguais gozando xuntos dunha afección común, que é un dos obxectivos fundamentais da actividade."
Trátase dos clubs "Os Artistas lectores" e "A Cabana dos Libros" nos que aprticipan trinta e dous alumnos e alumnas do CEP Brea Segade de Rianxo

Dous clubs de lectura en videoconferencia

2011-07-13T17:37:00.003+02:00

As distancias non son problema para falar de libros cando hai ganas e profesorado disposto a favorecer o intercambio entre alumnado que le. Velaquí unha experiencia de videoconferencia entre as lectores e lectores do club de lectura Lerias, do IES 1º de Marzo, de Baiona, e o club de lectura do IES Val do Tea, de Ponteareas. Información detallada e imaxes. Tamén aquí

Roteiro pola Ribeira Sacra lembrando Lois Pereiro

2011-07-01T15:21:00.002+02:00

Camiñada, lecturas, lembranza de Lois Pereiro, recitais ao aire libre, conversa, convivencia, lecturas, camiñadas... aprender a vivir e aprender o País. Unha forma ben fermosa de dar remate a un curso escolar. Velaquí unha experiencia dun club de lectura, o BIBLOSVIVOS, do IES Pedras Rubias, de Salceda de Caselas.

ACTIVIDADES CONXUNTAS DUNS CLUBS CON OUTROS

2011-06-29T13:34:00.003+02:00

O club de lectura Lecturas Leirantes realiza actividades conxuntas con outros clubs.

O 31 de marzo reuniuse co club "O xograr lector de Sarria" para realizar un roteiro de senderismo e comentar o libro A miña planta de laranxa lima de J. Mauro de Vasconcellos.

O 20 de maio actuaron como anfitrións e convocaron aos integrantes de "A vacaloura" do IES de Monterroso e ao alumnado de "O xograr lector" para realizar un roteiro literario polo adarve da muralla cun guía de luxo, Antonio Reigosa, autor de Lu e Go pola muralla. Á volta, na biblioteca, tivo lugar unha comida e, entre bocado e bocado, houbo tempo para charlas deste e outros libros.

Roteiro literario pola Devesa da Rogueira

2011-06-24T09:40:00.005+02:00

Desde o CPI Luís Díaz Moreno (Baralla, Lugo), infórmannos do roteiro literario que veñen de realizar os integrantes do Club de Lectura pola Devesa da Rogueria, no Courel, logo da lectura do libro "El hombre que plantaba árboles" de Jean Giono, neste Ano Internacional dos bosques.

+ Información no seu blogue, Barallando saberes, na sección do Club de lectura.

IV Xornada dos Clubs de lectura. Materiais

2011-06-12T23:00:00.013+02:00

Neste enlace están dispoñibles os materiais da IV Xornada dos Clubs de Lectura, celebrada o pasado venres 10 de xuño, en Santiago de Compostela, coa asistencia de 205 profesores e profesoras de toda Galicia que, no presente curso, coordinan clubs de lectura en centros de ensino secundario e de réxime especial (acceder como "convidado")

Están tamén dispoñibles, no mesmo enderezo, os vídeos das diferentes sesións.

Algúns dos blogues que informan tamén:
Os trasnos dos libros

Vídeo resume:

IV Xornada dos Clubs de lectura. Xuño 2011 from Bibliotecas Escolares de Galicia on Vimeo.

Proxecto europeo e-twinning para COMPARTIR LECTURAS

2011-05-24T10:00:00.014+02:00

Do Club de lectura do IES de Poio chéganos unha información da que entresacamos o seguinte texto:
Durante este curso académico o noso grupo de 1º de bacharelato de Club de lectura está desenvolvendo un proxecto europeo e-twinning centrado en COMPARTIR LECTURAS cun grupo da mesma idade do Lycée Maurice Ravel de Paris.
As tarefas permítenlles formarse como lectores activos xa que simultaneamente reciben e xeran informacións, adquiren e intercambian coñecementos lingüísticos das súas respectivas linguas e practícanas.
Consideramos moi innovador dende o punto de vista pedagóxico a interacción no proceso de ensino-aprendizaxe entre alumnos franceses e españois, eles son os receptores e a un tempo os directores do proceso; o profesorado só coordina, o alumnado interactúa, prepara os seus materiais, realiza as lecturas, elabora e publica os seus comentarios nos blogs, paralelamente son os correctores dos seus propios compañeiros e dos compañeiros europeos a través do chat do twinspace.
Tambien resulta novidoso que o intercambio de contidos literarios, lingüísticos, etnográficos, culturais se realice por medio de medios dixitais e de soportes como presentaciónes, vídeos, revistas creadas en: Power-point, Calaméo, Animoto, Prezzi, etc medios que nos axudan a salvar barreiras xeográficas doutra manera insalvables.
As coordinadoras seleccionan as lecturas de cada trimestre adecuándoas ao nivel de francés-español do alumnado, escollen e organizan as tarefas a realizar durante este, deciden as linguas a empregar dependendo do contexto comunicativo: así os alumnos franceses usan o español en todas as lecturas, nas tarefas e no chat, e o francés para corrixir os seus colegas españois; os alumnos españois usan o galego nas súas lecturas, o español para as súas tarefas e para corrixir aos seus compañeiros franceses, utilizan o francés nas súas publicacións e no chat.
Dependendo das datas senaladas en cada país – celebracións académicas, festividades populares…- publicáronse presentacións de imaxes: O ano novo chino en París, o entroido en Galicia, celebramos conxuntamente o Día da Poesía coa creación e intercambio de pequenos poemas (haikus), o alumnado escolleu este subxénero poético en homenaxe ao pobo xaponés. Lembramos tamén a poetas españois nas datas sinaladas. Traballamos a historia dos nosos países a través das nosas lecturas, en concreto a Guerra Civil española cos poemas de Miguel Hernández y la novela de Manuel Rivas “El lápiz del carpintero”, por este motivo enlazamos en nuestro espacio la exposición de la Biblioteca Nacional sobre Miguel Hernández. Traballamos o cine co visionado de filmes sobre as nosas lecturas (“El lápiz del carpintero”) e o comentario dos mesmos y música escoitando poemas musicados de autores como Miguel Hernández.

Haikus no CPI Tomás de Lemos (Ribadavia)

2011-05-20T13:47:00.006+02:00

O Club de Lectura do CPI Tomás de Lemos, de Ribadavia, fainos chegar información dunha actividade ben interesante:

"O noso club organizou un achegamento da comunidade educativa ao mundo dos haikus, e a resultas da mesma, e co material recollido, realizamos no centro unha exposición e botamos a andar un proxecto editorial que buscará ter continuidade outros cursos. Este proxecto ten forma de libro de poemas, que consta dunha recopilación dos haikus realizados, de imaxes da exposición (os haikus foron traducidos ao xaponés e ilustrados mediante técnicas parecidas ao sumi-e, a pintura aguada tradicional xaponesa) e dunha exposición didáctica que pensamos pode resultar intesante para trasladar esta actividade a outros centros. Para facilitar a difusión da experiencia calquera persoa interesada pode pedir un exemplar da publicación en arquivo informático á dirección do coordinador do club (MACNAVELarrobaedu.xunta.es) ou solicitar para préstamo dez volumes a toda cor que poñemos a disposición dos clubs interesados".

Do texto que presenta o libro editado, salientamos:
A realización desta primeira experiencia de achegamento á poesía Haiku tivo lugar no CPI Tomás de Lemos de Ribadavia (Ourense) durante o curso 2010 – 2011, e foi promovida polo club de lectura do centro. En colaboración cos departamentos de Ciencias Sociais, Plástica e as diferentes linguas, o club de lectura propuxo aos alumnos un concurso de Haikus. A finalidade era que os alumnos que estudaban os elementos da paisaxe e a climatoloxía (na materia de Xeografía) realizasen un achegamento sensorial, emocional e sentimental á paisaxe, máis alá dos elementos físicos. Consideramos que o haiku era unha forma especialmente axeitada para conseguilo. Un haiku é unha composición poética tradicional do Xapón. Ten tres versos sen rima, cunha extensión de cinco, sete e cinco sílabas . A temática aborda a natureza, o paso do tempo e as emocións. Para a súa realización procedeuse ao reparto das normas que deben seguirse na composición dos haikus. Estas han de ser moi sinxelas: Realización de tres composicións de tres versos cada unha; Os versos terán que ter 4 – 6 sílabas o primeiro e terceiro, e 7 – 9 o segundo; Nun dos versos terá que aparecer unha referencia ás estacións ou ao paso do tempo, noutro unha referencia á paisaxe.... Entregouse ao alumnado un alfabeto katakana (un alfabeto de ideogramas xaponeses coas súas equivalencias fonéticas no noso idioma), para que realizasen a transcrición fonética aproximada das súas composicións poéticas. Con estes elementos cada alumna e alumno (e aqueles membros da comunidade escolar que se animasen) realizarán un cartelón que combine un poema en calquera dos idiomas impartidos no centro, coa súa correspondente transcrición fonética (aproximada) e unha ilustración inspirada nos técnicas orientais. A nivel persoal, foi emocionante ver aos alumnos, especialmente aos de primeiro curso da ESO, esforzarse por entender outra cultura, outro idioma e por facer os seus primeiros achegamentos á poesía. O resultado do seu traballo encheunos de orgullo e ensinounos unha dimensión que descoñeciamos do noso alumnado. Foi, ademais, unha experiencia interdisciplinar, xa que nela participaron profesores de Ciencias Sociais, Plástica, Lingua Galega, Lingua Castelá e Lingua Inglesa.

IV Xornada dos Clubs de Lectura

2011-05-06T14:28:00.004+02:00

O vindeiro 10 de xuño reunirase en Santiago de Compostela o profesorado que coordina os 200 clubs de lectura que, neste curso, están a funcionar en centros de ensino secundario de Galicia.

Esta actividade está contemplada na convocatoria da Dirección Xeral de Centros e Recursos Humanos para incentivar o funcionamento de clubs de lectura, e busca o encontro entre profesores de distintos puntos de Galicia que están poñendo o seu tempo e a súa profesionalidade ao servizo da formación do seu alumnado como lectores e como cidadáns sensibles á cultura e ás súas manifestacións. A rapazada que participa das actividades dos Clubs de lectura aprende, ademais, a intecambiar opinións e a argumentar as propias ideas, competencia fundamental para vivir en democracia.

Esta IV Xornada dos clubs de lectura contará coa presenza de Ana Díaz-Plaja, profesora da Universitat de Barcelona e o escritor Fernando Marías. Haberá unha mesa de experiencias (Un club de lectura é algo máis) e tempos para o intercambio de iniciativas, por zonas.

PROGRAMA

Toman as rúas de Ourense co gallo do Día do Libro

2011-05-05T13:04:00.004+02:00

Os mozos e mozas de dous clubs de lectura da provincia de A Coruña (IES Castro da Uz, de As Pontes, e CPI Castro Baxoi, de Miño) xuntáronse unha vez máis nunha actividade compartida de lecturá pública... decidiron visitar Ourense e facer na Praza Maior unha lectura "plurilingüe" de O Principiño.
Leron e crearon, entre todos, un poema a partir das palabras do Principiño, que podemos ver no díptico

que editaron.

Os clubs de lectura dos centros de ensino secundario de Galicia, espazosde convivencia, de creación, de imaxinación, de aprendizaxe, de cidadanía...

Parabéns ao profesorado que o fixo posible, parabéns ás rapazas e rapaces participantes...

Información na prensa

Clubs que miran arredor

2011-04-14T12:10:00.004+02:00

Hoxe queremos pararnos co Club de lectura do IES Manuel Antonio de Vigo.
Un club "que mira arredor" porque conta cos residentes do centro de persoas maiores que hai ao ladiño do instituto. Con eles comparten lecturas e tempos.
Podemos velo a través do seu blogue do club de lectura que está enlazado co de biblioteca, e no que se atopamos varias categorías coas normas do club e os avisos, reseñas dos libros que se están a ler, a convocatoria das xuntanzas e un resumo do tratado, ... e os comentarios dos lectores e lectoras.
Este blogue tamén está enlazado co club de lectura virtual, "creado coa idea de que aquelas persoas que quixesen ler un libro e facer comentarios sobre el, pero non dispuxesen do tempo necesario para as sesións do club "le +" puidesen participar e compartir as súas opinións a través da rede, por iso recibe o nome de "le + na rede". Este club está dirixido a toda a comunidade educativa e a súa contorna, na que tamén tentan incluír aos traballadores do hospital e aos institutos próximos.

ENTRE CLUBS

2011-03-23T12:23:00.006+01:00

O club de lectura "Árbore vermella" do IES Xesús Taboada Chivite en colaboración co IES Ribeira do Louro puxeron en marcha o concurso "Adiviña quen é". Trátase, como o seu nome indica, de adiviñar a identidade dun autor misterioso, a partir dunha imaxe difuminada e unha serie de datos non demasiado evidentes.

Xa foron autores e autoras misteriosas Saramago e Mª Xosé Queizán.

Raiolectores, un club de lectura en Primaria

2011-02-16T09:23:00.003+01:00

Os clubs de lectura nas bibliotecas escolares galegas non son flor dun día... comezan a modo e vanse estabilizando grazas ao compromiso do profesorado e á motivación de todas as lectoras e de todos os lectores participantes.

Velaquí temos un exemplo nun centro de Primaria, o CEIP Andrade (Pontedeume, A Coruña), que conta cun club de lectura ben numeroso, e ben activo. Aquí temos aos Raiolectores en plena acción.

Aquí le todo o mundo!

2011-02-15T09:55:00.003+01:00

Por exemplo, compañeiras que traballan como persoal administrativo nos centros. Velaquí unha interesante entrada no blogue do IES Pedro Floriani (Redondela, Pontevedra), por parte dunha das participantes no Club de Lectura, Rebeca, a propósito da lectura da biografía de Marie Curie.

Dándolle ao zoco... para avanzar

2011-02-03T13:17:00.004+01:00

Entre as experiencias de colaboración con centros doutras Comunidades Autónomas, integradas no programa ARCE, salienta a participación dun Club de lectura, As zocas faladoras, do IES de Poio, que están a traballar conxuntamente con centros de Murcia, Canarias e Badajoz no programa EL PAÍS DE ALICIA.

Recentemente reuníronse en Canarias nunhas xornadas de traballo que, segundo se desprende da crónica realizada por Anxos Ríal, a coordinadora de As zocas faladoras e da Biblioteca do IES de Poio, foron intensas, e moi enriquecedoras a nivel persoal e profesional.

Resolta a convocatoria de Clubs de Lectura 2010/2011

2010-12-24T11:12:00.005+01:00

A través do Portal Educativo publicouse o pasado 22 de decembro a Resolución da Dirección Xeral de Centros e Recursos Humanos pola que se asignan as axudas para os Clubs de Lectura que presentaron solicitude en tempo e forma. A distribución dos 130.000€ dispoñibles para esta acción, encadrada no programa HORA DE LER, fíxose atendendo á calidade do proxecto presentado, á traxectoria demostrada polo club en anos anteriores, e ao número de grupos de lectores implicados.

Lémbrase a posibilidade de empregar LIBROS A EITO para o intercambio de lotes de libros. + Información

VARIOS CLUBS...

2010-11-17T15:43:00.002+01:00

VARIOS clubs comezan as súas reunións compartindo poemas para abrir boca (espertando o gusto pola poesía. Outros aproveitan algunha sesión para comentar libros que non leron en común pero que recomendan.
VARIOS clubs len EN GALEGO para apoiar a normalización lingüística, provocando que se acheguen á lingua e á literatura galega, que acepten a súa cultura, de forma natural.
VARIOS CLUBS coordinanse entre eles e o que se comezou a facer para aproveitar recursoos intercambiando os libros e películas, compartindo encontros con creadores/as... xa pasou a constituir unha mellora no desenvolvemento do club de lectura.
VARIOS CLUBS percorren rutas literarias e incluso hai algún que a crea arredor do autor ou autora máis próximo.
VARIOS clubs van introducindo a música como cultura compartida: a banda sonora do libro, as músicas da historia, os poemas musicados, as músicas que nos gustan...
... Porque de todo hai e gran a gran vaise enriquecendo o camiñar lector.

ASI SE DESPEDÍAN ... por Ponteareas

2010-11-10T08:49:00.002+01:00

DESPEDIDA E ROTEIRO LITERARIO POLO TEA
No club de lectura de despedida, ata a volta do verán, disfrutamos dun roteiro literario polo río Tea. Lemos un poema de Pablo Neruda, "El río" e inspirándonos no ambiente creamos unha historia entre todos.
E... o bizcoito de chocolate tampouco podía faltar, pero esta vez houbo intercambio gastronómico de postres, como ben dixo Pedro. Empezamos a avaliación do curso e os comentarios sobre o que supuxo para eles formar parte deste club de lectura. A continuación deixámosvos algúns dos comentarios:
"A oportunidade de ler libros que doutro xeito non se me ocurrirían"
"Unha nova experiencia que me aportou máis sabiduría"
"Relacionarme con xente nova, cos mesmos intereses "
"Falar de temas interesantes e enriquecedores"
"Unha experiencia xenial, onde podes expresar a túa opinión abertamente e compartila cos demáis"
"Te permite expresar a túa opinión sen medo a que a xente se ría de ti"

PECHE

2010-11-09T09:29:00.003+01:00

Do que se di ao despedirse, nesa sesión final na que, querendo ou sen querer, se avalía o traballo feito en cada un dos clubs:
“Para o ano que ven tamén hai club?”
“Polo tanto non sobra dicir que o vindeiro curso repetiremos a experiencia… isto é a mellor avaliación que se pode facer.”
“O club é a realidade-ilusión que ten máis presenza no centro. E para o ano máis e mellor, porque cremos que a lectura fainos medrar a tod@s.”

Veñen "lendo" forte....

2010-11-09T09:24:00.004+01:00

As nenas e os nenos do CEIP de Andrade, ao igual que os doutros centros de Primaria de Galicia, veñen pisando forte, e participan dunha forma entusiasta nos clubs de lectura que se organizan nos seus centros. Engadimos hoxe o Club de Lectura RAIOLECTORES á relación de Clubs de lectura, por dereito propio... Benvid@s!

LIBROS A EITO

2010-10-21T09:32:00.003+02:00

Este curso, o mesmo que o pasado, seguimos a utilizar o servizo de préstamo interbibliotecario a través de “libros a eito” con distintas bibliotecas escolares como o IES Fernando Esquío (Neda), IES Catabois (Ferrol), CPI A Baña, IES Pedra da Aguia (Camariñas), IES de Mugardos e IES Antonio Fraguas (Santiago).
Quixéramos facer fincapé no positivo desta experiencia, porque no só se trata de optimizar recursos, co que isto implica de darnos a posibilidade de facer máis lecturas das que nun principio nos permiten os fondos obtidos a través da convocatoria, senón que nos dá a oportunidade de compartir lecturas cos membros de clubs amigos e mesmo organizar actividades conxuntas”

Nestas datas, coincidindo cos III Encontros de bibliotecas escolares de Galicia 2010, varios centros están "quedando" para intercambiar libros. Quen máis se anima?

UNHA AVOA NO CLUB

2010-10-15T10:33:00.004+02:00

A avoa conta...
“No club de lectura estou a facer unhas lectura impensables para min hai só uns meses.”
“Estou a disfrutar enormemente coa vosa compañía e coa lectura, que sempre me gustou moitísimo.”

Porque a comunidade escolar é moito máis ampla do que se podería pensar
Porque os avós son un grupo de idade a ter en conta.

LAZOS ENTRE OS MEMBROS DO CLUB

2010-10-14T14:28:00.004+02:00

“Este grupo de lectores pertencen a diferentes pandillas do pobo; son de cursos educativos diversos; teñen caracteres, mesmo moi diverxentes, pero sábense membros dunha comunidade participativa e intercambian miradas de complicidade no vestíbulo ou nos corredores. Os lazos afectivos creados ao redor das lecturas van dando os seus froitos, e alumnos que antes se sentían raros polos seus intereses, saben agora que teñen con quen compartir afección.”

"Habemos de ir a Viana"

2010-10-11T08:42:00.003+02:00

a viaxe a viana from SonCine on Vimeo.

Crónica dunha experiencia compartida: a viaxe a Viana que fixeron os clubs de lectura de tres institutos galegos: O IES de Porto do Son, o IES Aquis Celenis, de Caldas e o CPI de Cuntis. Recollida no blogue Etiqueles, da biblioteca do IES de Porto do Son

CLUB DE LECTURA, UNHA E OUTRA VEZ...

2010-10-08T09:11:00.004+02:00

“A participación dos mediadores consistiu fundamentalmente en xestionarmos ou ofrecermos os turnos de palabra; só cando ninguén quería empezar o comentario, enchermos os posibles silencios, propormos outras interpretacións que aínda no se barallaran ou incorporarmos referencias persoais e afectivas respecto desas obras.
A comodidade coa que se sentían todos os membros dentro do club posibilitou comentarios moi persoais e interesantes sobre a experiencia lectora e a personalidade de cada un de nós. Ao final, todos e cada un dos participantes coñecían os gustos e preferencias lectoras dos demais.”

NOS COMEZOS

2010-10-07T15:32:00.002+02:00

“Nos primeiros días de setembro algúns membros do club preguntaron cando comezaban as reunións, dando por suposto que este ía convocarse de novo. Para implicalos máis, propúxoselles que fosen eles os que convencesen aos posibles participantes: nós só lles proporcionamos unha listaxe dos requisitos que debían cumprir. Vestiron as camisetas do club e visitaron as aulas de todo o centro explicando cal era a proposta, a periodicidade, as vantaxes de pertencer a el...”

DE CONCLUSIÓNS

2010-10-06T09:19:00.001+02:00

“Unha das conclusións que tiramos estes tres cursos é a de que na medida en que se dan tempos e espazos para a lectura, o desexo lector se abre, se contaxia... Para moitos é unha verdadeira revelación.

Alguén dixo da poesía que era un anxo que nos toca e xa non nos abandona. O mesmo podemos dicir da lectura.”

CONTA O ALUMNADO

2010-10-05T09:17:00.002+02:00

“Neste tempo lin moitas obras diferentes. Achegueime á literatura galega, lin máis poesía e teatro do que acostumaba e coñecín un montón de autores novos. Quizás o club de lectura foi o empurrón que necesitaba para mergullarme nunha literatura máis complexa e adulta, á que por min soa quizais non tivera accedido.”

O club no proxecto educativo do centro

2010-10-04T11:20:00.003+02:00

“En certo modo, este ano, tan significativo na curta vida dos Clubs de Lectura, supuxo un punto de inflexión, o fin dun ciclo laborioso e entusiasta, a partir do cal nos agardan outros cumes, coa seguranza de os poder acadar en base a unha maior formación, rigor e experiencia. (...)
Coidamos que esta experiencia está xa integrada no proxecto pedagóxico do instituto, instalada no seu imaxinario educativo, e no corazón de boa parte do alumnado e profesorado da nosa comunidade. Este é un feito transcendente, dun enorme valor pedagóxico, e sobre esta base teremos que seguir construíndo a nova sensibilidade lectora que anceiamos.
Nese “camiño de construción” dun sólido proxecto lector para o noso centro, o traballo do Club de lectura está resultando moi estimulante. Quizais sexa este feito, así como o pouso que deixa nos que participan da súa dinámica lectora e creativa, o seu maior logro, o seu maior motivo de orgullo.
Cómpre agardar, deixar madurecer o froito, pois no horto escolar a árbore da aprendizaxe sempre é xenerosa, e o desexo lector medra a base de paciencia e esperanza.”

Seguimos na colleita

2010-10-01T09:29:00.005+02:00

Recollemos, anaquiño a anaquiño, para ir facendo camiño...

"Algúns conciben o club de lectura como “rede de lectores”, un espazo de discusión no que puidesen compartir as súas lecturas que fomentasen neles a conciencia de pertencer a unha comunidade de lectores, isto é, sentirse parte dun grupo de iguais a través do gusto compartido pola literatura, ou, noutras palabras, converter a literatura nunha vía para a integración.
(...)
Posto que o proxecto se concibe como unha actividade á marxe do estritamente académico, do obrigatorio, pareceunos fundamental respectar os ritmos do alumnado na súa maior ou menos vinculación ao proxecto.
(...) Incrementouse notablemente o alcance da actividade do club ao vencellala ao desenvolvemento paralelo dunha rede de blogs, concibidos como unha revista dixital, na que, desde un enfoque interdisciplinar, profesorado e alumnado puidesen traballar diferentes contidos e ferramentas; así como á radio na que se inclúen recomendacións lectoras, programas sobre literatura e anuncios nos que se informa das actividades do club. (...) Comezouse a trasladar boa parte da actividade do blogue ás redes sociais, especialmente Tuenti, ao ser a plataforma dixital máis empregada polo alumnado.
(...)Os nosos obxectivos foron contribuír á constancia lectora, isto é, valorar a lectura como unha actividade cotiá, non excepcional, presente non só en determinados espazos e momentos e, en particular, educar para o ocio."

COMPARTIR O LIDO. COMPENSAR DIFICULTADES

2010-09-30T13:37:00.004+02:00

Así contan, o que se fai nun club...

"COMPARTIR O LIDO con outros compañeiros: a experiencia cultural compartida, o contaxio de entusiasmos, a xeración dunha rede de afectos, o intercambio de opinións e experiencias lectoras... a produción de grupos amistosos, o afianzamento do interese persoal pola lectura e a axuda á construción da propia identidade. Establecemento de afectividades ao compartir lecturas, espazos e tempos.
Realización de actividades que axudan a COMPENSAR DESIGUALDADES de tipo social e económico (suplindo carencias como a existencia de libros na casa, o feito de que os pais non saiban aconsellar lecturas ou non o fagan de acordo coa escola). A lectura pode servir como eixe para revertir espectativas negativas xeneradas polos factores sociais."

DE CLUBS E HORA DE LER

2010-09-27T13:27:00.017+02:00

Así nolo contan...

"NO NOSO CENTRO o feito de desenvolver desde hai anos a actividade Hora de ler favorece o éxito do Club porque o alumnado está acostumado a manexar libros, ler por pracer e falar de libros. O club é outra vía máis para consolidar o hábito lector, favorece que os adolescentes continúen lendo e permite que profesorado e alumnado dialoguen e se coñezan mellor.
Pensamos que non se trata de ler moitos libros senón de gozar e aprender moito cos que se len. Para o profesorado é interesantísima esta actividade que permite coñecer ben os lectores e favorece unha relación afectiva entre todos os membros."

¡NUNCA NOS CANSAREMOS DE DICILO!

2010-09-23T14:51:00.003+02:00

“Nun dos grupos participaban tamén estaban as profesoras de Audición e Linguaxe (AL) e a de Pedagoxía Terapéutica (PT). Foi moi interesante porque serviu para que o profesorado implicado na atención á diversidade participase e se abrise a unha nova liña de traballo que podía servir para apoio a alumnado con dificultades de aprendizaxe. Antes de comezar as sesións reunímonos todo o profesorado e comentamos un pouco o libro Dime de Aidan Chambers e como iamos facer: en ningún momento o alumnado tiña que sentir que a nosa opinión estaba por encima da deles senón que todos formabamos un grupo unido en torno aos libros e que todas as opinións eran válidas. Para o profesorado esta foi unha experiencia moi grata e da que aprendemos moito. (...)
Estamos moi satisfeitas sobre todo de que o noso Club permitise a atención á diversidade, que servise para a compensación de desigualdades."

VOCES FEMININAS NA BIBLIOTECA

2010-09-21T09:33:00.005+02:00

As nais escriben...

“Nunha reunión tan agradable como é a da nosa cita na biblioteca, cada ano asistimos a un encontro, que é unha ledicia, e que coincide co inicio da nosa aventura de descubrir o mundo a través das páxinas dos libros.
Este encontro vai seguido da despedida dalgunhas compañeiras e da chegada doutras. De todas formas, entre todas nace un vínculo, o dos libros.
De novo a viaxe literaria toca ao seu fin, pero só polo de agora, Ana, non te libras de nós tan facilmente, cando nos invitaches a ler o mundo.”

REUNIÓN FINAL DE VALORACIÓN

2010-09-20T12:58:00.005+02:00

"Celebramos unha reunión final á que asistimos todos os membros dos diferentes grupos do Club. Trátase dun momento de valoración da actividade e de reflexión sobre os obxectivos acadados. O 95% dos lectores repetirán no club o vindeiro curso.

En xeral, todos destacaron a importancia de compartir con outras persoas a paixón pola lectura para, deste xeito, aprender a interpretar os textos de diferentes maneira e atopar segundos significados ás historias lidas.

Outros salientan a importancia das reunións para entender mellor os libros e a súa temática, e achegarse a lecturas que por si sós nunca realizarían."

A IDEA ...

2010-09-20T10:32:00.009+02:00

"A idea de levar a cabo esta actividade xorde no curso 2007-2008 coa intención de fomentar a lectura nun grupo de lectores que decide, por gusto e non por deber, reunirse periodicamente para falar e compartir lecturas, experiencias, gustos, inquedanzas e opinións.

Esta actividade pretende potenciar o criterio persoal para que sexan os propios lectores os que desenvolvan a curiosidade polos libros, sen necesidade de intermediarios, procurando na lectura entretemento e coñecemento, pracer e cultura.

Por outra banda, a nosa intención tamén foi colaborar na adquisición da competencia básica no emprego das TIC como fonte de obtención de información e como soporte de divulgación das propias creacións, como un instrumento máis para "aprender a aprender".

O punto de partida para acadar estes obxectivos é a propia biblioteca como espazo de lectura imprescindible e como lugar ao que eles mesmos sintan a necesidade de acudir."

CINEFÓRUM no CLUB

2010-09-20T10:12:00.004+02:00

"Celebrouse unha tarde por trimestre. As películas estaban vinculadas aos contidos dos libros que se leron. esta novidade pretendeu conciliar o cine coa literatura, e espertar así a súa sensibilidade. Que vexan que tamén se pode analizar o comportamento de personaxes e temáticas, no cine igual que na literatura. Para facerlles máis atractiva a actividade, que xa de por si o é, permitíuselles asistir ao cinefórum acompañados de amigos, coñecidos ou mesmo familiares de calquera idade, co obxectivos de acadar máis membros para o club. Sería enriquecedor que os pais se involucrasen dalgún xeito."

O NOME DO CLUB

2010-09-20T09:26:00.006+02:00

"O nome do noso club, Avelaíña, explícase porque as avelaíñas son as bolboretas nocturnas que voan ao redor da luz, e o primeiro curso que se desenvolveu o club gustounos este nome pois nos pareceu unha boa metáfora, elas voan ao redor da luz coma nós nos reunimos ao redor dos libros para falarmos deles."

OS XOVES ÁS CATRO

2010-09-17T10:11:00.003+02:00

Escribe unha alumna participante:
“Coas mans cheas de libros
Así é como abandonamos esta aventura, e digo aventura porque non se me ocorre outro termo no que conflúan todas as reunións que tivemos durante estes dous cursos. Todas e cada unha delas conformaron este pequeno universo literario que nos rodea, porque, ao fin, foron os propios libros os que nos emocionaron, os que nos ollaron, os que nos releron, os que nos analizaron. Foron eles os que alimentaron cada historia, todas en ringleira, como agardando por nós.
Neste remate, tan só me queda un sentimento profundo de devoción pola literatura, e xunto a el, unha grandísima gratitude a todo o que representa este club. A todas as relacións que, dentro del e a través das páxinas escritas, naceron en cada comentario, en cada risa, en cada historia e nesta paixón común reavivada os xoves ás catro.”

COMENTARIOS DO COORDINADOR DUN CLUB

2010-09-16T14:48:00.003+02:00

“Desde a coordinación só podemos ter palabras de gratitude por tod@s @s integrantes do club. Foron unha ducia de sesións nas que compartimos debate intenso, amor pola literatura, ideas, risos... E sabemos que nada disto sería posíbel sen o tesón que supón combinar o rendemento académico coa paixón pola lectura. Eramos conscientes de que o ritmo que se propuña era elevado e, sen embargo, souberon responder con sorprendente madurez. Os seus comentarios nas sesións en común sempre foron acertados. Aprendemos tod@s. Este coordinador ten que recoñecer que a lectura de obras consagradas, pasadas pola peneira dunhas novas olladas, sempre lle aportou sensacións diferentes.”

ENQUISAS aos membros do CLUB

2010-09-15T12:50:00.006+02:00

Recollemos...

"Os resultados foron moi satisfactorios e o conxunto da experiencia foi altamente positivo.

Resulta tamén alentador as respostas ás preguntas nas que se pedía o aspecto máis positivo e o aspecto susceptible de mellorar, porque en ambos se incide na importancia de compartir, de escoitar, de aprender do compañeiro, de descubrir... en definitiva, de gozar da experiencia da lectura compartida.

No último apartado de observacións, o agradecemento e a vontade de seguir pertencendo ao club foron os aspectos máis repetidos."

COINCIDINDO...?

2010-09-15T12:38:00.003+02:00

"Os obxectivos marcados polo club de lectura estaban directamente relacionados coa necesidade de fomentar a lectura entre o alumnado do centro e crear novos espazos e vencellos de comunicación e afecto entre os membros da comunidade educativa.

O principal atranco co que nos encontramos foi a dificultade para establecer reunións periódicas de carácter presencial debido a que os nosos alumnos e alumnas se desprazan diariamente en transporte escolar."

SEGUIREMOS TRABALLANDO...

2010-09-15T12:27:00.005+02:00

Así nolo contan...

"Seguiremos traballando, convencid@s como estamos de que ler é unha actividade interesante e divertida e que a tod@s @s que nos lemos nos gusta moito contar o que lemos, cando nos gusta e mesmo cando nos gusta menos, pero que sempre queremos contar algo e expresarnos dalgunha maneira. Este, os clubs de lectura, son un instrumento magnífico para conseguir este obxectivo."

NOMES PARA UN CLUB

2010-09-14T12:57:00.003+02:00

"Os comelibros"
"Amigos da lectura"
"Palabras"
"Lectores sen fronteiras"
"Co libro á tumba"
"Books to power"
"Lerias"
"O obradoiro das letras de Firmin"
"Andaina literaria"
"O cofre do tesouro"
"Coristranca"
"Merlín"
"O recuncho de Tobías"
"Lendo no galiñeiro"
"Valdeláncara"
"Lectour@s"
"A Cova das Palabras"
"DeManenMan"
"Marole"
"Lecturas leirantes"
"Alborada"
"Bibliodoce"
"Devoralibros"
"A nora dos libros"
"Mareia"
"Ortegalendo"
"Vaidelibros"
... e varios centros máis

MÁIS REFLEXIÓNS

2010-09-14T12:27:00.005+02:00

"O café das tres que trae a profe e os doces dos rapaces son xa unha tradición na sobremesa dos luns no IES. Algún pregunta: "É certo que tomades café nas reunións do Club? E aínda me podo apuntar?" Un día pretendín cancelar a reunión da seguinte semana porque moitos dos rapaces ían de excursión; case cae o ceo. Unha rapaza exclamaba: "Se ísto é o mellor da semana!"

Algún compañeiro dime: "Total, os que len, xa len!" Si, é certo, pero ísto é bo para eles: síntense importantes, incluso envexados por algún compañeiro. Tamén vexo como uns chaman polos outros e hai días que aparece unha cara nova: "É amiga miña, vén ver que facemos." "Vale, pois que quede!"

Nunca pensara que Cien años de soledad ía levantar tantas paixóns. Un alumno xa leu catro libros de García Márquez; varios din que é o mellor que leron nunca. Resulta inexpresable o ambiente que Macondo creou na biblioteca...

Que máis dá! O caso é que formar parte dun club de lectura é unha experiencia indescríptible e nós sentímonos orgullosos del. Un dos nosos membros inventou un sáudo e despedida que empregamos moito: "UN LIBRAZO!!!"

LECTURAS PARA A REFLEXIÓN

2010-09-14T12:16:00.004+02:00

Así o conta o club de lectura "Ao pé da letra"

"Participamos en tertulias literarias convocadas polo concello de Ourense. Para preparar a tertulia lemos o libro Zara y el librero de Bagdad, de Fernando Marías e fixemos reunións de posta en común. Falamos de temas relaiconados como as guerras, a Guerra Civil española, a guerra de Irak, o amor en todas as súas facetas (fraternal, de parella, filial, o amor desinteresado cara aos descoñecidos...),etc. Vimos documentais onde se comparaba a traxedia dos campos de exterminio nazis coa do conflito entre Israel e Palestina,... Tamén contamos no centro coa intervención dun xornalista da TVE, Ramón Pazos, que nos amosou imaxes e falou da súa experiencia nun país en guerra."

UNHA ACTIVIDADE DA BIBLIOTECA

2010-09-14T12:05:00.005+02:00

Uns escriben...

"O club de lectura é unha actividade da biblioteca escolar. Unha das estanterías da biblioteca está reservada dende o curso pasado para a promoción do club entre o alumnado."

Outros...

"As reunións do club de lectura teñen lugar na biblioteca, co obxectivo de facer visible a actividade e, tamén, a relación entre a lectura e a biblioteca."

"A biblioteca é o lugar natural do club de lectura. Os participantes no club teñen un papel protagonista na biblioteca escolar."

"Co club imos ocupando outros lugares, incluso fóra da centro, pero de vez en cando volvemos a reunirnos na biblioteca, para non esquecer que ese é un espazo fundamental para a lectura, alí están os nosos libros, as películas que proxectamos, as músicas que escoitamos e de aí parten as búsquedas que facemos arredor das historias que lemos."