Roteiro literario por Celanova

 

O alumnado do club de lectura do IES Ribeira do Louro, de O Porriño (Pontevedra), deu remate ao curso cunha visita literaria a Celanova, a vila dos poetas, a terra de Curros Enríquez, Celso Emilio Ferreiro e Xosé Luís Méndez Ferrín. Velaquí o vídeo deste roteiro literario e da visita á biblioteca do IES de Celanova, que sempre resulta impactante, por estar aloxada no que fora a sala capitular do antigo mosteiro. Roteiro literario por excelencia, Celanova acolle ao alumnado dos clubs de lectura con frecuencia e ofrécelles oportunidadees para continuar avanzando na súa formación cultural e lectora.

Seguindo as pegadas de "A Esmorga"

 

Club de lectura do IES de Porto do Son, no Liceo de Ourense co actor de Sarabela Teatro, Fernando Dacosta, falando da obra de Blanco Amor, A esmorga. 

Os integrantes do club de lectura do IES de Porto do Son (Porto do Son, A Coruña) relatan a súa visita literaria á cidade de Ourense, o pasado 25 de xaneiro. Unha crónica completa dunha xornada destinada a seguirlles os pasos aos protagonistas da obra de Eduardo Blanco Amor, A esmorga. Un exemplo dos moitos roteiros literarios que os clubs de lectura están a realizar por Galicia adiante, nunha proposta global de aprendizaxe e de posta en valor dos recursos culturais do noso país.

Roteiro literario de "A Esmorga". Clube cultural Alexandre Bóveda/Concello de Ourense

Por terras de Celanova, lendo a Celso Emilio Ferreiro

Os mozos e mozas do Club de Lectura do IES Alexandre Bóveda, de Vigo, realizaron unha ruta literaria por terras de Celanova, cos poemas de Celso Emilio Ferreiro como "materia" de lectura. No blogue do centro podemos ler a crónica desta xornada literaria. Un bo exemplo das actividades que os clubs de lectura dos centros de ensino secundario de Galicia están a organizar. Un bo argumento tamén para desmontar ese tópico de que "os mozos non len".

Roteiro pola Ribeira Sacra lembrando Lois Pereiro

Camiñada, lecturas, lembranza de Lois Pereiro, recitais ao aire libre, conversa, convivencia, lecturas, camiñadas... aprender a vivir e aprender o País. Unha forma ben fermosa de dar remate a un curso escolar. Velaquí unha experiencia dun club de lectura, o BIBLOSVIVOS, do IES Pedras Rubias, de Salceda de Caselas.

Roteiro literario pola Devesa da Rogueira

Desde o CPI Luís Díaz Moreno (Baralla, Lugo), infórmannos do roteiro literario que veñen de realizar os integrantes do Club de Lectura pola Devesa da Rogueria, no Courel, logo da lectura do libro "El hombre que plantaba árboles" de Jean Giono, neste Ano Internacional dos bosques.

+ Información no seu blogue, Barallando saberes, na sección do Club de lectura.

Clubs de lectura viaxan a Portugal

Nesta entrada do blog da biblioteca do IES de Porto do Son podemos ler a súa crónica da viaxe conxunta que fixeron, ao remate do curso, as rapazas e rapaces integrantes dos clubs de lectura de tres institutos, procedentes de distintos puntos de Galicia: o Club de Lectura iESCALDaletras, do IES Aquis Celenis (Caldas de Reis, Pontevedra), o Club de Lectura As Campaíñas, do CPI Aurelio M. Rey García (Cuntis, Pontevedra) e o Club de Lectura do IES de Porto do Son (Porto do Son, A Coruña). Un exemplo de colaboración entre clubs de lectura, unha interesantísima iniciativa dos seus integrantes... unha experiencia que vincula á lectura e á cultura dun xeito fundamental... parabéns!!!

Clubs de lectura e roteiros literarios

Os Clubs de lectura como "cédulas de cidadanía". Un exemplo máis: os rapaces e rapazas do Club de lectura do IES Alexándre Bóveda, de Vigo levan realizado varios roteiros literarios, seguindo as súas lecturas. Nesta ocasión coñecemos a súa viaxe ao Courel, na procura das pegadas de Uxío Novoneyra. Ler as palabras do Poeta nas paisaxes que as fixeron nacer é unha forma ben fermosa de achegármonos á literatura. Parabéns ao profesorado que o fixo posible e aos rapaces e rapazas que tiveron a ocasión de vivilo!