40 autoras e autores + lidas/os nos Clubs de lectura do ámbito educativo galego. Curso 2018/2019.

Publícase a relación dos 40 autores e autoras máis lidos polos Clubs de lectura participantes na convocatoria de Clubs de Lectura para centros que matriculan alumnado de ensino secundario, bacharaleto, formación profesional ou ensinanzas de réxime especial de Galicia. Estas lecturas corresponden ao curso 2018/2019 e son o resultado do reconto realizado trala lectura das memorias correspondentes remitidas polos centros. Unha autora ou un autor pode  ver varios dos seus títulos seleccionados polo conxunto dos clubs. De aí a diferencia desta relación coa, xa publicada, dos 50 títulos máis lidos no mesmo período.

Os 50 títulos + lidos nos Clubs de lectura do ámbito do ensino secundario en Galicia- 2018/2019

Coma en anos anteriores, publícase a relación dos 50 títulos máis lidos nos Clubs de lectura dos centros de ensino secundario de Galicia, durante o curso 2018/2019. 

Lémbrase que ésta relación é diferente á dos autores ou autoras máis lidos, posto que no conxunto dos clubs pódense ler varios títulos da mesma creadora ou creador. Esta nova listaxe publicarase próximamente.

XII Xornada dos Clubs de lectura

O vindeiro 7 de xuño, celebrarase na EGAP (Escola Galega da Administración Pública) a reunión anual do profesorado que coordina os clubs de lectura dos centros que participan no programa de CLUBS DE LECTURA, da Consellería de Educación, Universidade e Formación Profesional. Neste curso 2018/2019 recibiron asignación, a través da convocatoria do programa, un total de 253 centros que matriculan alumnado de ESO, BAC, FP, Ensinanzas de Persoas Adultas, e Ensinanzas de réxime especial (Conservatorios e Escolas de idiomas). Esta XII Xornada dos Clubs de Lectura reunirá así a preto de 280 persoas, entre participantes, relatores e asesores e asesoras de formación do profesorado. 

Haberá ocasión para amosar o estudo sobre os clubs de lectura, realizado por José Antonio Millán para esta consellería, no pasado ano 2018, en colaboración coa D.X. de Centros e Recursos Humanos, a través da Asesoría de Bibliotecas Escolares. 

Entregarase, así mesmo, o Premio dos Clubs de Lectura 2019, que desta vez recaeu na escritora María Reimóndez, por ser a autora galega máis lida nos clubs de lectura no curso 2017/2018, tal e como se recolle na Resolución do 23 de abril de 2019, que explica as particularidades deste premio, que xa recibiron Agustín Fernández Paz, Ledicia Costas, Miguelanxo Prado e Carlos Negro.

O programa contempla así mesmo a participación de María José Masanet, profesora e investigadora da Universitat Poempeu Fabra; celebrarase unha mesa sobre mediacións lectoras; o activista da lectura Marijn Brouckaert falará das "lecturas compartidas", como ferramenta de intervención social; Antonio Sandoval amosará a súa experiencia como moderador dun club de lectura temático sobre ciencias da natureza e a poeta Tamara Andrés impartirá un obradoiro de poesía. Pechará a xornada a escritora e académica Marilar Aleixandre. 

PROGRAMA

50 títulos máis lidos nos Clubs de Lectura. Curso 2017/2018

Publícanse os 50 títulos máis lidos no conxunto dos clubs de lectura adscritos o programa CLUBS DE LECTURA, da Consellería de Educación, Universidade e Formación Profesional, durante o curso 2017/2018, en centros que matriculan alumnado de ESO, bacharelato, formación profesional ou ensinanzas de réxime especial (conservatorios, escolas oficiais de idiomas, ensinanzas de persoas adultas). Durante o curso 2017/2018 participaron desta iniciativa un mínimo de 231 clubs de lectura (que foron os que recibiron asignación específica para o seu funcionamento).Unha lectura detallada desta relación fala da diversidade de lecturas presentes nestes grupos de lectura.

Resolución definitiva da convocatoria de Clubs de Lectura para o curso 2018/2019

Club de lectura do IES Agra de Raíces (Cee, A Coruña)

O Portal Educativo publicou xa a resolución definitiva da convocatoria de Clubs de Lectura para o curso 2018/2019, segundo Resolución do Dirección Xeral de Centros e Recursos Humanos, de 31 de decembro de 2018. Distribúense contías, por un importe global de 215.000€ para o funcionamento de grupos de lectura en 243 centros públicos que matriculan alumnado de ESO, Bacharelato, Formación Profesional ou Ensinanzas de Réxime Especial. Estas asignacións estarán destinadas nun mínimo do 75% á adquisición de libros para o desenvolvemento da actividade propia do club, a lectura (os libros que se adquiran pasarán a integrarse na colección da biblioteca escolar); un máximo do 25% poderá destinarse a costear actividades complementarias do club tales como encontros con creadores/as, visitas culturais relacionadas con librarías, bibliotecas, encontros con outros clubs, visionado de películas ou asistencia ao teatro, sempre en actividades relacionadas coa actividade dos grupos de lectura.

• PUBLICACIÓN NO PORTAL EDUCATIVO

Convocatoria de apio aos Clubs de lectura para o curso 2018/2019

 Reunión de club de lectura no IES As Barxas (Moaña)

Publicada no Portal Educativo a Convocatoria da D.X. de Centros e Recursos Humanos pola que se estimula e apoia o funcionamento de clubs de lectura en centros públicos que imparten ensino secundario, bacharelato, formación profesional e outras ensinanzas (persoas adultas e ensinanzas de réxime especial).

O prazo de presentación de solicitudes remata o 15 de outubro de 2018.

Informe: Clubs de lectura curso 2016/2017

 Un momento no taller de grafiti, na X Xornada dos Clubs de lectura. 17/06/2017

 

No momento en que se están a recoller e comezando a valorar as memorias de actividades dos clubs de lectura correspondentes ao curso 2017/2018, dáse a coñecer un informe a partir dos datos do funcionamento dos clubs de lectura no curso anterior, o 2016/2017. Os avances son evidentes, se se comparan con datos do  período precedente (2015/2016), xa publicados.

Recomendamos a súa lectura e felicitamos ás comunidades educativas polos resultados da súa participación nesta iniciativa a prol da lectura no ámbito educativo.

• INFORME DOS CLUBS DE LECTURA 2016/2017

Resolución definitiva Clubs de lectura 2017/2018

Alumnado do IES Porto do Son, nunha sesión do Club de lectura. 

Está xa publicada no  Portal Educativo a Resolución definitiva da D.X. de Centros e Recursos Humanos pola que se adxudican as contías para o funcionamento de Clubs de lectura en centros públicos que matriculan alumnado de ensinanza secundaria, bacharelato, formación profesional ou ensinanzas de réxime especial, para o presente curso 2017/2018.

• Publicación no Portal Educativo
• Texto da Resolución

Galerías de imaxes da X Xornada dos Clubs de lectura

 Unha escena das "Quedadas Entreclubs" de primeira hora da tarde

 

Xa están dispoñibles tres galerías de imaxes tomadas no Palacio de Congresos de Santiago de Compostela o pasado 17 de xuño, na X Xornada dos Clubs de lectura: ACCESO A TODAS AS GALERÍAS DE IMAXES:

• EMILIO ROCA
• PABLO CHOUZA
• ASESORÍA DE BIBLIOTECAS ESCOLARES

Convocatoria de clubs de lectura para o curso 2016/2017.

O pasado 1 de setembro publicábase a convocatoria destinada a incentivar o funcionamento dos clubs de lectura nos centros de ensino secundario de Galicia para o curso 2016/2017, por un importe global de 210.000€. 

O prazo de presentación de solicitudes remata o 15 de outubro. 

•   Convocatoria no Portal Educativo

• + INFORMACIÓN

Crear vínculos coa lectura, desde a lectura, para a lectura

Desde o Club de lectura do CPI O Progreso, de Catoira, achégannos este vídeo-resume das actividades levadas a cabo durante o curso 2015/2016, así como da xornada compartida co Club de Lectura Os Trasnos dos libros, do IES de Poio. Un bo exemplo do moito e bo que se coce nos clubs de lectura de ámbito educativo de Galicia.

Vídeo resume da IX Xornada dos Clubs de Lectura

Velaquí o vídeo resume do que foi a IX Xornada dos Clubs de Lectura, celebrada en Compostela o pasado 10 de xuño, coa asistencia do profesorado dos 239 centros de ensino secundario de Galicia que contaron este ano con axuda para o funcionamento dos seus correspondentes clubs de lectura.

O club de lectura é unha fórmula que dá resultados.

Ao longo destes catro cursos de funcionamento do noso club de lectura, os profesores implicados comprobamos que é unha das actividades que máis contribúe a fomentar a afección pola lectura e a dinamizar a Biblioteca Escolar. O feito de crear un espazo no que profesores e alumnos poden intercambiar experiencias sen a distintción de roles propia da clase contribúe a desenvolver hábitos de lectura e a xerar vencellos afectivos a través dos libros. É, polo tanto, unha actividade que xa está consolidada no Plan Lector do noso centro e pretendemos que poida chegar a outros membros da comunidade escolar.

Club de lectura. IES Monelos (A Coruña)

Concurso "¿Qué estás leyendo?" da OEI

A Organización de Estados Iberoamericanos publicou xa a convocatoria do concurso ¿Qué estas leyendo? correspondente ao ano 2014. Nesta ocasión, convidan aos lectores e ás lectoras de entre 15 e 17 anos, para que inscriban blogues persoais, arredor dos libros e das lecturas, neste concurso que ten como premio unha viaxe a Bos Aires, onde se realizará un encontro con todos os galardoados dos diferentes países iberoamericanos. Unha ocasión única para compartir experiencia lectora con outros rapaces e rapazas. Os bloques poden estar en calquera das linguas oficiais, dos países participantes na OEI polo que o galego podería estar presente tamén neste encontro, pois ao igual que este ano 2013, agardamos que a participación galega sexa alta. O prazo de inscrición remata o 30 de xullo.

En efecto, o pasado 19 de marzo fíxose entrega en Compostela dos premios queestasleyendo.org aos blogues gañadores e finalistas do Estado Español na convocatoria 2013. Tanto os gañadores como 4 dos 10 blogues finlistas eran galegos.

+ INFORMACIÓN sobre este acto

Esta convocatoria é unha oportunidade para que os rapaces e as rapazas dos clubs de lectura, xa suficientemente motivados, poidan poñer en marcha unha iniciativa persoal (ou grupal) que sirva de plataforma para a expresión da súa creatividade tanto na escrita como no audiovisual, tendo sempre como fondo os libros e as lecturas, pero tamén a música, o videoxogo, o cine...`É oportunidade tamén para desenvolver competencias dixitais e de produción de información (ALFIN en estado puro). 

 

Presentación de libros en librarías, coa presenza de alumnado

Esta é a nota informativa de editorial:

"O mércores, 20 de novembro, ás 12:00 horas, na libraría Couceiro, praza de Cervantes, 6 de Santiago, terá lugar a presentación do libro Ámote Leo A. Destino xalundes de Rosa Aneiros.

No acto participarán Manuel Bragado, Rosa Aneiros e contará coa colaboración especial de alumnos e alumnas do IES Eduardo Pondal de Santiago, acompañados pola profesora Mercedes Espiño."

A presentación de libros está a sufrir cambios de interese. 

Nuns casos, pasan a ocupar novos lugares como as bibliotecas escolares.

Noutros, como o que nos ocupa, pasan a convidar novo público. 

Son estas fórmulas necesarias para vitalizalar as presentacións e darlle novos pulos. E virán outras, virán aquelas nas que o alumnado acuda a presentacións fóra de hgorario lectivo, porque a ligazón entre educación e cultura se faga máis forte.

Por que nos enriquecen os clubs de lectura?

                                                                                         No roteiro Sarmiento

"Foi enriquecedor escoitar as opinións do alumnado, moitas veces sorprendentes pero atinadas, comprobar a paixón dalgúns con algún dos libros e gozar dun ambiente relaxado arredor da lectura. Fóronse creando lazos entre nós que contribuíron ao noso enriquecemento persoal, facéndonos máis agradable a vida no Instituto. A lectura compartida engádelle valor e estimula o hábito lector. Estamos aprendendo, estamos pasándoo ben.(...)

A avaliación global non pode ser máis que positiva, o Club cumpre os obxectivos de fomento da lectura e de núcleo de integración e convivencia do alumnado. O Club é motor da difusión do hábito lector no IES, a porta de entrada á Biblioteca e aos seus fondos, un elemento central e de prestixio dentro da vida educativa."

Retelladores do galiñeiro. IES Antón Losada Diéguez (A Estrada)

VI Xornada dos clubs de lectura (vídeo resume)

VI Xornada dos Clubs de Lectura from Bibliotecas Escolares de Galicia on Vimeo.

Vídeo que resume o ambiente e o contido da VI Xornada dos Clubs de Lectura, celebrada en Compostela o 31 de maio de 2013, organizada pola Dirección Xeral de Centros e Recursos Humanos, coa colaboración do Servizo de Formación do Profesorado. Esta iniciativa encádrase no programa HORA DE LER, de fomento da lectura en centros de ensino, e reúne anualmente ao profesorado que coordina os clubs de lectura que existen nos centros de ensino secundario de Galicia, ao abeiro da convocatoria  da Consellería de Cultura, Educación e O.U., de axudas para o seu funcionamento. 

ACCESO AOS VÍDEOS DAS DIFERENTES SESIÓNS

Os clubs de lectura contribúen á adquisición de competencias básicas

Mesa de experiencias: Clubs de lectura e competencias básicas from Bibliotecas Escolares de Galicia on Vimeo.

Velaquí a mesa de experiencias que baixo o título "Participar nun club de lectura serve para adquirir competencias imprescindibles", tivo lugar na mañá da VI Xornada dos Clubs de Lectura, celebrada en Compostela o 31 de maio de 2013. Interveñen:
- Begoña Valdés, do IES Ramón Otero Pedrayo, de A Coruña
- Julio Abalde, do IES Ribeira do Louro, de O Porriño
- Almudena Platero, do IES Xesús Ferro Couselo, de Ourense
- Delio Chao, do CPI Luís Díaz Moreno, de Baralla (Lugo)  

ACCESO A TODOS OS MATERIAIS E VÍDEOS DA XORNADA (entrar como "convidado")

Nova convocatoria "¿Que estás leyendo?"

Desde o 1 de marzo e ata o 30 de xullo de 2013 está aberto o prazo de inscrición no concurso ¿QUÉ ESTÁS LEYENDO? da OEI (Organización de Estados Iberoamericanos), destinado a recoñer blogues de lectoras e lectores de 12 a 15 anos. Estes blogues poden estar en calquera lingua dos estados membros (polo que o galego pode ter unha presenza activa), e poden realizarse de forma individual ou en grupo. É pois unha oportunidade para o alumnado dos clubs de lectura, que cómpre valorar. 

Toda a INFORMACIÓN aquí

Libros que dan de si / clubs que dan que falar

O club de lectura do IES Val do Tea é un bo exemplo. O seu blogue Club de lectura BiblioTea demóstranolo en cada entrada. Agora, fáisenos máis evidente cando imos lendo as que aparecen arredor do libro Amor en Amman de Berta Vias Mahou, publicado por Anaya:

Antes da reunión: Ammor en Amman, onde está Amman?

Antes da reunión: Ammor en Amman, quen conta a historia?

Antes da reunión, a literatura en Ammor en Amman

Antes da reunión, a arte en Ammor en Amman

A música en Ammor en Amman

Os mares en Ammor en Amman

Arqueoloxía en Ammor en Amman

Ammor en Amman despois da reunión

Unha maneira marabillosa de adentrarse nun libro, de facelo pedra de toque, protagonista e centro de interese da actividade.

A creación dun liberespazo propio, dunha constelación cultural, dun mundo.