9/9/21

Convocatoria de Clubs de lectura para o curso 2021/2022

Vén de publicarse no Portal educativo a convocatoria de 12 de agosto de 2021, da Dirección Xeral de Centros e Recursos Humanos, no contexto das actuacións para o fomento da lectura no ámbito educativo, pola que se incentiva o funcionamento de CLUBS DE LECTURA en centros públicos de titularidade da Consellería de Cultura, Educación e Universidade que acollen ensinanzas de educación primaria, secundaria, bachalerato, formación profesional ou ensinanzas de réxime especial para o curso 2021-2022.



O prazo límite para a presentación de solicitudes remata o 15 de outubro de 2021 (data incluída)

Accede aquí á convocatoria

29/7/21

Materiais da XIII Xornada dos Clubs de Lectura

 



O pasado 4 de xuño de 2021 celebrouse, no Palacio de Congresos de Santiago de Compostela, a XIII Xornada dos Clubs de Lectura  que reuniu, presencialmente, a preto de 250 persoas, entre participantes, relatores e asesores e asesoras de formación do profesorado.
 
 
No enlace que adxuntamos a redeBE podedes acceder aos vídeos das presentacións e aos materiais aportados  polos poñentes.
 

Premio dos Clubs de Lectura 2021 para Eva Mejuto

 



Co gallo da celebración do Día do Libro, a Dirección Xeral de Centros e Recursos Humanos, da Consellería de Cultura, Educación e Universidade , fai pública a Resolución de 23 de abril de 2021 pola que se recoñece a Eva Mejuto co Premio dos Clubs de Lectura 2021. 
 
No ano 2015 creouse este premio co obxecto de recoñecer cada ano a aqueles autores e autoras que, cos seus libros, axudan á construción de lectoras e lectores nestas etapas da adolescencia e a mocidade que, no ámbito da lectura, están consideradas como etapas de risco de abandono, ao ampliarse o abano de estímulos e intereses. Uns creadores comprometidos coa lingua que achegan a materia prima coa que os clubs de lectura poden contribuír á extensión da lectura en galego. Na resolución de creación do premio contemplábase que “o Premio dos Clubs de Lectura poderá entregarse unha soa vez a un autor ou autora. No caso de que o primeiro creador da relación resultante nun curso xa tivese recibido o premio, este seralle concedido ao autor ou autora seguinte na relación”.   Até o momento recibiron este galardón os escritores Agustín Fernández Paz (2015), Ledicia Costas (2016), Miguelanxo Prado (2017), Carlos Negro(2018), María Reimóndez (2019) e Andrea Maceiras (2020).
 
Eva Mejuto é unha das autoras más seguidas polo lectorado infantil e xuvenil galego. Na súa web podemos coñecer toda a súa traxectoria e todos os seus libros. Dous dos seus títulos, Memoria do silencio e 22 segundos están incluídos entre os 50 libros máis lidos nos Clubs de lectura no curso 2019/2020

21/4/21

AUTORAS/ES MÁIS LIDAS/OS NOS CLUBS DE LECTURA

 40 autoras e autores + lidas/os nos Clubs de lectura do ámbito educativo galego. Curso 2019/2020.




Publícase a relación dos 40 autores e autoras máis lidos polos Clubs de lectura participantes na convocatoria de Clubs de Lectura para centros que matriculan alumnado de ensino secundario, bacharaleto, formación profesional ou ensinanzas de réxime especial de Galicia. Estas lecturas corresponden ao curso 2019/2020 e son o resultado do reconto realizado trala lectura das memorias correspondentes remitidas polos centros. Unha autora ou un autor pode  ver varios dos seus títulos seleccionados polo conxunto dos clubs. De aí a diferencia desta relación coa, xa publicada, dos 50 títulos máis lidos no mesmo período.

12/1/21

Resolución definitiva da convocatoria de Clubs de Lectura para o curso 2020/2021



O Portal Educativo vén de publicar a resolución definitiva da Convocatoria de Clubs de Lectura para o curso 2020/2021, segundo Resolución da Dirección Xeral de Centros e Recursos Humanos do 23 de decembro de 2020. Distribúense contías, por un importe global de 200.000€, para o funcionamento de grupos de lectura en 213 centros públicos que matriculan alumnado de ensino secundario, bacharelato, formación profesional ou ensinanzas de réxime xeral. Estas asignacións estarán destinadas nun mínimo do 85% á adquisición de libros para o desenvolvemento da actividade propia do club, a lectura (os libros que se adquirirán pasarán a integrarse na colección da biblioteca escolar); un máximo do 15% poderá destinarse a costear actividades complementarias do club tales como encontros con creadores/as, visitas culturais relacionadas con librerías, bibliotecas, encontros con outros clubs, visionado de películas ou asistenca ao teatro, sempre relacionadas coa actividade dos grupos de lectura.
 

1/12/20

Resolución provisional da convocatoria de Clubs de lectura. Curso 2020/21

O Portal Educativo publica hoxe a Resolución da Dirección Xeral de Centros e Recursos Humanos pola que se dá a coñecer a relación provisional de centros que reciben asignación para o funcionamento de clubs de lectura no curso 2020/21. 

- RESOLUCIÓN PROVISIONAL


 

30/10/20

Os 50 + lidos nos Clubs de lectura. Curso 2019/2020

Publícase a relación dos 50 títulos máis lidos nos Clubs de lectura dos centros de ensino secundario de Galicia no pasado curso 2019/2020.

 



29/10/20

Convocatoria de Clubs de Lectura para o curso 2020-2021

 


Vén de publicarse no Portal educativo a convocatoria de Clubs de Lectura para o curso 2020-2021, da Dirección Xeral de Centros e Recursos Humanos, pola que se estimula e apoia o funcionamento de clubs de lectura en centros públicos de titularidade da Consellería de Cultura, Educación e Universidade que acollen ensinanzas de educación secundaria, bachalerato, formación profesional ou ensinanzas de réxime especial.

O prazo de presentación de solicitudes remata o 16 de novembro de 2020.


25/6/20

Informe Clubs de lectura do curso 2018/2019

Coma en anos anteriores, publícase un breve informe sobre as actuacións dos Clubs de lectura que participaron na convocatoria de 2018/2019, logo da lectura das memorias correspondentes e a recollida da información ofrecida polos centros. 

 

23/4/20

Premio dos Clubs de Lectura 2020 para Andrea Maceiras

A escritora Andrea Maceiras é unha das autoras máis seguidas polo lectorado galego. Os seus libros están sempre entre os máis lidos polos clubs de lectura e ten recibido o recoñecemento dos expertos a través de diversos galardóns, como o Premio Lazarillo 2018 co seu libro "Conta nove estrelas".

Tras dar a coñecer a relación dos 40 autores e autoras máis lidas polos Clubs de Lectura no curso 2018/2019, a D.X. de Centros e Recursos Humanos publica hoxe, co gallo do Día Mundial do Libro, a Resolución do 23 de abril de 2020 pola que se recoñece o labor de Andrea Maceiras como escritora de textos de interese para os mozos e mozas galegos, a través do Premio dos Clubs de Lectura 2020. 

16/4/20

40 autoras e autores + lidas/os nos Clubs de lectura do ámbito educativo galego. Curso 2018/2019.


Publícase a relación dos 40 autores e autoras máis lidos polos Clubs de lectura participantes na convocatoria de Clubs de Lectura para centros que matriculan alumnado de ensino secundario, bacharaleto, formación profesional ou ensinanzas de réxime especial de Galicia. Estas lecturas corresponden ao curso 2018/2019 e son o resultado do reconto realizado trala lectura das memorias correspondentes remitidas polos centros. Unha autora ou un autor pode  ver varios dos seus títulos seleccionados polo conxunto dos clubs. De aí a diferencia desta relación coa, xa publicada, dos 50 títulos máis lidos no mesmo período.

20/12/19

Os 50 títulos + lidos nos Clubs de lectura do ámbito do ensino secundario en Galicia- 2018/2019

Coma en anos anteriores, publícase a relación dos 50 títulos máis lidos nos Clubs de lectura dos centros de ensino secundario de Galicia, durante o curso 2018/2019. 

Lémbrase que ésta relación é diferente á dos autores ou autoras máis lidos, posto que no conxunto dos clubs pódense ler varios títulos da mesma creadora ou creador. Esta nova listaxe publicarase próximamente.

16/12/19

Resolución da convocatoria de clubs de lectura para o curso 2019/2020

O Portal Educativo publicou xa a resolución definitiva da Convocatoria de Clubs de Lectura para o curso 2019/2020, segundo Resolución da Dirección Xeral de Centros e Recursos Humanos do 13 de decembro de 2019. Distribúense contías, por un importe global de 220.000€, para o funcionamento de grupos de lectura en 247 centros públicos que matriculan alumnado de ensino secundario, bacharelato, formación profesional ou ensinanzas de réxime xeral. Estas asignacións estarán destinadas nun mínimo do 75% á adquisición de libros para o desenvolvemento da actividade propia do club, a lectura (os libros que se adquirirán pasarán a integrarse na colección da biblioteca escolar); un máximo do 25% poderá destinarse a costear actividades complementarias do club tales como encontros con creadores/as, visitas culturais relacionadas con librerías, bibliotecas, encontros con outros clubs, visionado de películas ou asistenca ao teatro, sempre relacionadas coa actividade dos grupos de lectura.
 

16/9/19

Convocatoria de apoio aos Clubs de lectura para o curso 2019/2020



 Reunión de club de lectura no IES Valadares (Vigo)



Publicada no Portal Educativo a Convocatoria da D.X. de Centros e Recursos Humanos pola que se estimula e apoia o funcionamento de clubs de lectura en centros públicos que imparten ensino secundario, bacharelato, formación profesional e outras ensinanzas (persoas adultas e ensinanzas de réxime especial).

O prazo de presentación de solicitudes remata o 15 de outubro de 2019.


Texto da convocatoria aquí

27/5/19

XII Xornada dos Clubs de lectura

O vindeiro 7 de xuño, celebrarase na EGAP (Escola Galega da Administración Pública) a reunión anual do profesorado que coordina os clubs de lectura dos centros que participan no programa de CLUBS DE LECTURA, da Consellería de Educación, Universidade e Formación Profesional. Neste curso 2018/2019 recibiron asignación, a través da convocatoria do programa, un total de 253 centros que matriculan alumnado de ESO, BAC, FP, Ensinanzas de Persoas Adultas, e Ensinanzas de réxime especial (Conservatorios e Escolas de idiomas). Esta XII Xornada dos Clubs de Lectura reunirá así a preto de 280 persoas, entre participantes, relatores e asesores e asesoras de formación do profesorado. 
Haberá ocasión para amosar o estudo sobre os clubs de lectura, realizado por José Antonio Millán para esta consellería, no pasado ano 2018, en colaboración coa D.X. de Centros e Recursos Humanos, a través da Asesoría de Bibliotecas Escolares. 

Entregarase, así mesmo, o Premio dos Clubs de Lectura 2019, que desta vez recaeu na escritora María Reimóndez, por ser a autora galega máis lida nos clubs de lectura no curso 2017/2018, tal e como se recolle na Resolución do 23 de abril de 2019, que explica as particularidades deste premio, que xa recibiron Agustín Fernández Paz, Ledicia Costas, Miguelanxo Prado e Carlos Negro.

O programa contempla así mesmo a participación de María José Masanet, profesora e investigadora da Universitat Poempeu Fabra; celebrarase unha mesa sobre mediacións lectoras; o activista da lectura Marijn Brouckaert falará das "lecturas compartidas", como ferramenta de intervención social; Antonio Sandoval amosará a súa experiencia como moderador dun club de lectura temático sobre ciencias da natureza e a poeta Tamara Andrés impartirá un obradoiro de poesía. Pechará a xornada a escritora e académica Marilar Aleixandre. 

PROGRAMA

22/4/19

Relación dos "40 + lidos" nos Clubs de lectura durante o curso 2017/2018



Autores/as más lidos/as nos Clubs de lectura
Curso 2017/2018
Nº orde
Autor/a
Títulos lidos
 (entre todos os clubs)
1
Ledicia Costas
154
2
Agustín Fernández Paz
73
3
María Victoria Moreno
62
4
María Reimóndez
37
5
María Solar
36
6
Jordi Sierra i Fabra
35
7
Carlos Negro Romero
33
8
Agatha Christie
29
9
R.J. Palacio
29
10
Héctor Cajaraville Araújo
28
11
Laura Gallego García
27
12
Miguelanxo Prado Plano
27
13
Andrea Maceiras Lafuente
26
14
Eva Mejuto Rial
26
15
Manuel Núñez Singala
26
16
Paco Roca
23
17
Francisco Castro
22
18
Roald Dahl
22
19
Pedro Feijoó Barreiro
21
20
Xabier Puente Docampo
20
21
Marcos Calveiro
19
22
Dolores Redondo Meira
19
23
César Mallorquí
18
24
Tsugumi Ohba
18
25
Fran Alonso
17
26
Mark Haddon
17
27
Marilar Jiménez Aleixandre
17
28
Patrick Ness
17
29
Xabier Quiroga
17
30
Antón Riveiro Coello
17
31
Antoine Saint-Exupèry
17
32
Care Santos
16
33
Robert Louis Stevenson
16
34
Fina Casalderrey
15
35
Domingo Villar
15
36
Anxo Fariña
14
37
Manuel Rivas
14
38
John Boyne
13
39
Santiago Lopo
13
40
Chimamanda Ngozi Adichie
13

24/1/19

50 títulos máis lidos nos Clubs de Lectura. Curso 2017/2018

Publícanse os 50 títulos máis lidos no conxunto dos clubs de lectura adscritos o programa CLUBS DE LECTURA, da Consellería de Educación, Universidade e Formación Profesional, durante o curso 2017/2018, en centros que matriculan alumnado de ESO, bacharelato, formación profesional ou ensinanzas de réxime especial (conservatorios, escolas oficiais de idiomas, ensinanzas de persoas adultas). Durante o curso 2017/2018 participaron desta iniciativa un mínimo de 231 clubs de lectura (que foron os que recibiron asignación específica para o seu funcionamento).Unha lectura detallada desta relación fala da diversidade de lecturas presentes nestes grupos de lectura.